Урганч шаҳридаги Шовот канали бўйидаги сайилгоҳда содир бўлган нохуш ҳолат тўғрисида ижтимоий тармоқларда тарқалган хабар юзасидан Миллий гвардия Хоразм вилояти бўйича бошқармасми масъул ходимлари томонидан ўрганиш ишлари олиб борилди.

Шовот канали бўйлаб жамоат хавфсизлигини таъминлаш Миллий гвардия ва ҳуқуқни муҳофаза қилувчи органлар билан ҳамкорликда  амалга оширилади. Мазкур канал бўйлаб сайилгоҳнинг узунлиги етти километрга яқин масофани ўз ичига олганлиги  сабабли ушбу ҳудудда пиёда патрул йўналиш бўйлаб ҳаракатланиши билан бирга ҳудуд бўйлаб ташвиш тугмалари ҳам ўрнатилган.Унда чақирувга асосан Патрул гуруҳлари 2-3 дақиқада етиб бориши таъминланган. Шунингдек, фуқаролар мурожаатлари учун “102”  ҳамда“1215” қисқа рақамлари мавжуд бўлиб улар 24/7 режимда ишлаши ва келиб тушган хабарларга тезкор чоралар кўрилиши назарда тутилган..

 Шовот канали ҳудудида содир бўлган  мазкур воқеа юзасидан  эса ушбу қисқа рақамларга мурожаат, ташвиш тугмаларидан сигнал ёки шикоят келиб тушмаган.

Шуни алоҳида таъкидлаш жоизки Миллий гвардия ҳар қандай зўравонлик, жамоат тартибининг бузилиши ва фуқаролар хавфсизлигига таҳдид солувчи ҳолатларга нисбатан кескин ва муросасиз позицияни қатъий сақлайди.

Шу боис, фуқаролардан  жамоат жойларида кўрилган шубҳали ҳолатлар, жанжаллар ёки зўравонлик аломатлари ҳақида дарҳол “102”  ҳамда“1215” қисқа рақамлари орқали Миллий гвардия ёки Ички ишлар органларига хабар беришларини ва хавфсиз муҳитни таъминлашда фаол иштирок этган ҳолда фуқаролик масъулиятини намоён этишлари илтимос қилиб қоламиз!

Ҳозирда вилоят ҳуқуқни мухофаза қилиш органлари томонидан Урганч шаҳри бўйлаб парк ва хиёбонлар ҳамда сайилгоҳларда бу каби ҳолатлар такрорланмаслиги юзасидан тегишли чора-тадбирлар олиб борилмоқда.