Ўзбекистон Республикаси Президентининг 2024-йил 15-ноябрь кунидаги “Ўқувчи-ёшларни чақирувга қадар бошланғич тайёрлаш тизимини янги босқичга олиб чиқиш чора-тадбирлари тўғрисида” ПҚ-393-сон қарорига асосан республикадаги ҳар бир туман (шаҳар)да битта умумий ўрта таълим мактаби негизида ташкил этилган болаларни кичик ёшидан Ватанга чексиз садоқат руҳида, жисмонан соғлом ва маънавий етук инсонлар қилиб тарбиялашга йўналтирилган «Жасорат мактаблари»га 2025-2026 ўқув йили учун танлов асосида қабул қилинган ўқувчилар пойтахтимиздаги “Ғалаба боғи” ёдгорлик мажмуаси саф майдонида тантанали равишда “Ваъда” бериш маросими ўтказилди.
Тадбирда Ўзбекистон Республикаси Мактабгача ва мактаб таълими вазирлиги, Мудофаа вазирлиги, Фавқулодда вазиятлар вазирлиги, Ички ишлар вазирлиги, Миллий гвардия қўмондонлиги, Тошкент шаҳар ҳокимлиги, вазирлик ва идораларнинг вакиллари, оммавий ахборот воситалари ходимлари, фахрий меҳмонлар ҳамда ота-оналар иштирок этди.
Ўқувчилар кенг жамоатчилик олдида баралла яхши ўқишга, Ватанимизга, Халқимизга ва Президентимизга садоқатли, мард фарзанд бўлишга баралла “Ваъда” беришди.
Тантанали маросимда алоҳида ҳарбий намунали-кўргазмали оркестр, Миллий гвардия Ҳарбий мусиқа академик-лицейининг “Зарбли чолғулари ансамбли”, “Темурбеклари мактаби”, ўқувчилардан иборат қўл жанги гуруҳи, “Кинология хизмати” ҳамда Миллий гвардия Фахрий қоровул бўлинмасининг кўргазмали чиқишлари намойиш этилди.
Шундан сўнг “Жасорат синфлари” ўқувчилари билан масъул раҳбар ва офицерлар, фахрийлар биргаликда фотосуратга тушишиб, “Миллат фидойилари” ёдгорлик монументига гул қўйиш маросими ташкил этилди.
Албатта бу ерда ўтказилган тадбир ўсиб келаётган ёш авлод қалбида ушбу Миллат фидойиларининг қаҳрамонликлари билан бир умрга сақланиб қолади ҳамда уларни ватанпарварлик руҳида улғайишига туртки бўлади десак муболаға бўлмайди.