“Амир Темурнинг ёшлар тарбиясидаги ўрни” шиори остида ўтказилган танлов ғолиблари тақдирланди
Республика Маънавият ва маърифат маркази томонидан Ўзбекистон Республикаси Мудофаа, Ички ишлар ва Фавқулодда вазиятлар вазирликлари, Миллий гвардияси ҳамда Давлат хавфсизлик хизмати билан ҳамкорликда “Темурбеклар мактаби” ҳарбий-академик лицейлари ўртасида кўрик танлов ўтказилди.
Буюк Амир Темурнинг мардона руҳи, жасорати, саркардалик маҳорати, ватанга бўлган садоқати ва юксак маънавий фазилатларини ёшлар онгига ва қалбига сингдиришга қаратилган ушбу танлов иккита босқичда бўлиб ўтди. Уларда иштирокчилардан танлов мавзусига мос равишда иншолар ёзиш ва расм чизиш талаблари қўйилган эди.
Жумладан, “Амир Темурнинг ёшлар тарбиясидаги ўрни” мавзусидаги иншолар танловида 3-ўринни Миллий гвардия, 2-ўринни Ички ишлар ҳамда фахрли 1-ўринни Мудофаа вазирлиги “Темурбеклар мактаби” ҳарбий-академик лицейлари ўқувчилари эгаллади.
Расмлар танловида эса, 3-ўрин Ички ишлар, 2-ўрин Миллий гвардия ва фахрли 1-ўрин Мудофаа вазирлиги “Темурбеклар мактаби” ҳарбий-академик лицейлари ўқувчиларига насиб қилди.
Бугун Миллий гвардия “Темурбеклар мактаби”да мазкур танловнинг республика босқичи ғолибларини тантанали тақдирлаш маросими ўтказилди.
Маросимда танлов ташкилотчилари, Миллий гвардия қўмондонлиги ҳамда ҳарбий-академик лицейлардан ташриф буюрган масъул раҳбарлар иштирок этди.
Тадбирда ўзининг билими ва шижоатини намоён этиб, ғолибликни қўлга киритган ёшлар муносиб тақдирланди.
Хусусан, 1 ва 2-ўринларни эгаллаган ўқувчиларга компьютер, китоблар жамланмаси ва дипломлар, 3-ўринни эгаллаган ёшларга планшетлар ва бошқа қимматбаҳо совғалар топширилди.
