ҲАРБИЙ ХИЗМАТЧИЛАР ВА УЛАРНИНГ ОИЛА АЪЗОЛАРИ ТEАТРДА МАДАНИЙ ҲОРДИҚ ЧИҚАРИШДИ
Инсон маънавий оламини юксалтиришда, онг ва тафаккурини теранлаштиришда театр санъатининг ўрни беқиёс. Санъат одамларни эзгуликка чорлайди, яхшиликка ундайди, энг гўзал ҳис-туйғуларни инъом этади. Театр шунчаки оддий томошахона эмас, балки тарбия, маданият, маънавият ва маърифат масканидир.
Жумладан, Миллий гвардия ҳарбий хизматчилари ва уларнинг оила аъзолари маънавиятини янада юксалтириш, дам олиш кунларини мароқли ўтказишларини таъминлаш мақсадида Миллий гвардия Андижон вилояти бўйича бошқармаси ҳарбий хизматчилар ва уларнинг оила аъзолари ҳамда вилоятда ташкил этилган оилавий болалар уйи тарбияланувчилари Андижон шаҳрида жойлашган қўғирчоқ театри томошасига ташриф буюришди.
Болажонларга мўлжалланган ушбу "Қирол шер" номли спектакль намойиши давомида асарни янада бойитишга хизмат қилган саҳна декорациялари, актёрларнинг ижролари, мусиқа ва ашулалар болажонлар ва уларнинг ота-оналари эътиборини тортди.
Театр ҳаёт кўзгуси, муқаддас даргоҳ саналади. Унинг тарбияга йўғрилган сабоқлари эса кишиларни одамийликка чорлаб тураверади. Ўзбек театр асосчиларидан бири Маҳмудхўжа Беҳбудий таъбири билан айтганда, “Театр ибратхонадир”.
