ҲАРБИЙ ХИЗМАТЧИЛАРНИНГ ОИЛАЛАРИ ИШ БИЛАН ТАЪМИНЛАНМОҚДА
Ўзбекистон Республикаси Президентининг 5 та муҳим ташаббуси доирасида хотин-қизларнинг бандлигини таъминлаш, тадбиркорликни, хусусан, оилавий тадбиркорликни ривожлантириш, “устоз-шогирд” анъаналари асосида ҳунармандчилик билан шуғулланишни тарғиб этиш, тикувчилик, пиллачилик соҳасида касаначиликни кенгайтириш орқали бандликни таъминлаш борасида самарали ишлар амалга оширилмоқда. Бундан келиб чиқиб, Ўзбекистон Республикаси Миллий гвардияси тизимида хизмат қилаётган ҳарбийларнинг аёлларини иш билан таъминлаш масаласига алоҳида эътибор қаратилмоқда.
Хусусан, Тошкент шаҳри Бектемир туманида Миллий гвардия ҳарбий хизматчиси Ш.Абдуллаевнинг турмуш ўртоғи О.Абдуллаева томонидан фаолияти йўлга қўйилган тикувчилик цехи бунинг яққол мисолидир. Тикувчилик цехи очилиш маросимида сўзга чиққанлар бу каби кичик корхоналарнинг иш бошлаши аҳоли бандлигини таъминлашда инновацион ечим эканлигини таъкидладилар.
15 нафар ҳарбий хизматчининг оила аъзолари бандлиги таъминланган ушбу корхонада 50 турдаги болалар ва аёллар кийим-кечак маҳсулотлари ишлаб чиқарилиши кўзда тутилган. Миллий гвардия қўмондонлиги ва Бектемир тумани ҳокимияти кўмагида ташкил этилган тикув цехида устоз-шогирд анъанаси самарали йўлга қўйилган бўлиб, тикувчилик сир-асрорларини ўрганмоқчи бўлган хотин-қизлар малакали устозлардан таълим олишлари мумкин. Бунинг учун корхонада барча шароитлар яратилган.
Тадбир сўнгида ушбу “Либослар уйи”ни ташкил этишда жонбозлик кўрсатганларга Миллий гвардия қўмондонлиги томонидан ташаккурномалар тақдим этилди.
