ҲАРБИЙ ХИЗМАТЧИ ВА ХОДИМЛАР ҲАМДА ТАЪЛИМ МУАССАСАЛАРИ КУРСАНТ ВА ЎҚУВЧИЛАРИ ЎРТАСИДА ЎТКАЗИЛГАН ВИКТОРИНА ҒОЛИБЛАРИ АНИҚЛАНДИ
Ўзбекистон Республикаси Миллий гвардияси Қўриқлаш бош бошқармаси, ҳудудий бошқармалар ҳарбий хизматчилари ва ходимлари, Жамоат хавфсизлиги университети курсантлари ҳамда “Ҳарбий мусиқа” ва “Темурбеклар мактаби” ҳарбий академик лицейлари ўқувчилари иштирокида Ўзбекистон Республикаси Қуролли Кучлари ташкил топганлигининг 32-йиллиги ҳамда 14 январь - Ватан ҳимоячилари куни байрами муносабати билан Жамоат хавфсизлиги университети маънавият-маърифат марказида “Янги Ўзбекистонга садоқат билан хизмат қиламиз” деб номланган викторина ўтказилди. Унда 10 та жамоа 3 та шарт бўйича ўзаро беллашишди. Мазкур викторинанинг фарқли жиҳати шундан иборатки, иштирокчилар барча шартларни инглиз тилида бажаришди. Бундан кўзланган мақсад эса, ҳар томонлама билимли, чет тилларини мукаммал эгаллаган кадрларни тайёрлашдан иборатдир. Шахсий таркибнинг бир нечта хорижий тилларни билиши ривожланган давлатларнинг илғор тажрибасини ўрганишда муҳим аҳамият касб этади.
Викторинанинг биринчи шартида жамоалар, ўзларини креатив тарзда таништиришга урғу қаратди. Иккинчи, учинчи шартларда эса саволларга жамоавий ва якка ҳолда жавоб беришди. Шу орқали улар ўзларининг инглиз тили саводхонлигини кўрсатиб беришди.
Жамоаларнинг чиқишлари Шарқшунослик ва Жаҳон тиллари университетларининг профессор ўқитувчилари томонидан баҳолаб борилди.
Якунда фахрли 3-ўринни Миллий гвардия Ҳарбий мусиқа академик лицейи ўқувчилари қўлга киритишди. 2-ўринга эса Миллий гвардиянинг Тошкент вилояти Қибрай туманида жойлашган бригадаси ҳарбий хизматчилари сазовор бўлишди. 1-ўринни қўлга киритган Жамоат хавфсизлиги университети курсантлари бу йилги викторинанинг ҳам ғолиби бўлишиб, кубокни ўзларида сақлаб қолишди.
Барча ғолиб ва совриндорлар, номинациялар бўйича ютуққа эришганлар ташкилотчилар томонидан муносиб рағбатлантирилди.
