Аввал хабар берганимиздек, Давлатимиз раҳбарининг Оммавий спортни янги босқичга олиб чиқиш борасида олимпия ва паралимпия ҳаракати йўналишида белгилаб берган вазифалари юзасидан, Миллий гвардия қўмондони Р.Джураевнинг навбатдаги манзилли учрашуви паракамондан отиш спортчилари билан бўлиб ўтди.
Давлатимиз раҳбари видеоселектор йиғилишида, 2028 йилда Лос-Анжелесда бўладиган Олимпия ўйинларида кучли ўнталикка кириш мақсад қилингани ва бунинг учун тайёргарликни кучайтиришни таъкидлаб 26 та спорт федерацияларини ривожлантиришга алоҳида эътибор қаратди.
Белгилаб берилган устувор вазифаларнинг амалий ижроси юзасидан Миллий гвардия қўмондони - Ўзбекистон Камондан отиш федерацияси раиси Р.Джураев, пойтахтимизнинг Чилонзор туманидаги Спорт мактаби фаолияти билан танишиб, машғулот олиб бораётган паракамончилар билан учрашди.
Мазкур учрашув, Ўзбекистон Камондан отиш федерацияси раҳбарияти ва штаб аъзолари, Тошкент шаҳар Спорт бошқармаси бошлиғи Б.Убайдуллаев, Паралимпия қўмитасининг катта мураббийи Д.Абдубакиров, спорт мактаби директори А.Абдураимов ва тажрибали мураббий У.Имомқулов бошчилигидаги 13 нафар паракамон спортчилари (3 та халқаро тоифадаги ва 1-2 даражали спорт усталари) иштирокида бўлиб ўтди.
Унда Олимпия ва Паралимпия спортини ривожлантириш ҳамда спортчиларни муносиб иштирокини таъминлаш борасида моддий техник базани яхшилаш, Камондан отиш ва Паракамондан отиш спортчиларининг биргаликдаги мавсумий мусобақалар ўтказилишини тизимлаштириш, Паракамондан отиш миллий терма жамоаси таркибини кучайтириш ва улар билан ўқув йиғинларини ташкиллаштириш, чет элдан илғор тажрибалар, грантлар жалб қилиш чораларини кўриш каби масалалар юзасидан юқорида санаб ўтилган мутасадди раҳбар ва мураббийларнинг фикр-мулоҳазалари тингланиб истиқболли режалар белгилаб олинди.
Ўз навбатида паракамончилар ҳам, Давлатимиз раҳбарининг доимий эътиборларини ҳис қилаётганликларини айтиб, ўз миннатдорчиликларини билдиришди. Шунингдек, яратиб берилаётган имкониятлардан унумли фойдаланган ҳолда тинимсиз меҳнат қилиб, 2028 йилда Лос-Анжелесда бўлиб ўтадиган Олимпия ўйинларида нафақат иштирок этиш балки, юқори натижалар билан юртбошимиз ишончини оқлашларига ваъда беришди.
