АЗИМ САМАРҚАНДГА САЁҲАТ
Кўҳна ва ҳамиша навқирон Самарқанд неча асрлардан буён ўзининг бетакрорлиги, қадимий обидалари, гўзал масканлари билан дунё халқларини ҳамон ўзига жалб этиб келмоқда. Унинг кўп асрлик буюк тарихи, ўзига хос маданияти, миллий урф отадлари билан танишиш барчага бирдек, қизиқиш уйғотади.
Юртибошимиз томонидан мамлакатимизда ташқи ва ички туризмни ривожлантириш масаласига жиддий эътибор қаратаётгани, унинг амалий ифодаси сифатида маҳалла, ташкилот ва муассаса жамоалари, уларнинг оила аъзолари уюшган ҳолда республикамизнинг тарихий жойларига мунтазам равишда саёҳатлар уюштираётганлиги қувонарли ҳолдир.
Ушбу анъанани давом этириш мақсадида куни кеча Ўзбекистон Республикаси Миллий гвардияси қўмондонлиги ташаббуси билан Қўриқлаш бош бошқармасининг Тошкент шаҳар ва Самарқанд вилояти Қўриқлаш бошқармалари ҳамкорлигида, Тошкент шаҳар маҳаллаларидаги жами 100 га яқин уюшмаган ёшлар учун Самарқанд шаҳрининг диққатга сазовор жойларига саёҳат ташкил этилди.
Ёшларнинг мароқли ва мазмунли ҳордиқ чиқаришларини кўзлаган мазкур саёҳат буюк аллома Имом ал-Бухорий мақбарасини зиёрат қилишдан бошланди. Ундан сўнг Самарқанднинг юраги бўлмиш Регистон мажмуаси, Гўри-Амир, Шоҳи Зинда мақбаралари, Улуғбек, Бибихоним мадрасалари бўйлаб экскурсия уюштирилди. Зиёратчилар маҳоратли мутахассис гид - таржимон Д. Джумаева ҳамроҳлигида аждодларимиз томонидан қолдирилган бой маданий мерослар, экспонатлар, қўлёзмалар, узоқ тарихдан сўзловчи суратларни кўздан кечириш билан бирга, қизиқарли ҳамда қимматли маълумотларга ҳам эга бўлишди.
Шунингдек, шаҳар ҳудудида амалга оширилган ободонлаштириш ва ҳунармандчилик ишлари саёҳатчиларда катта таассурот қолдирди. Мазмунли саёҳат давомида ёш йигит қизлар қалбида жўш урган Ватанпарварлик ҳисси келгусидаги мақсадлари сари одимлашга, яхши ният билан эзгу амалларни бажаришга хизмат қилса, ажаб эмас.
