“БАХШИЧИЛИК САНЪАТИ” БЎЙИЧА КЎРИК ТАНЛОВ ВИЛОЯТ БОСҚИЧИ ҒОЛИБЛАРИ СУРХОНДАРЁДА
Ўтган ой мобайнида Миллий гвардия барча ҳудудий бўлинма ва муассасаларида “Бахшичилик санъати” бўйича кўрик танловнинг вилоят босқичлари кўтаринки руҳда ўтказилди.
Ҳайъат аъзоларининг одилона ҳукмига кўра саралаш босқичларида ғолибликни қўлга киритган ҳарбий хизматчи ва ходимлар кеча мамлакатимизнинг жанубидаги гавҳари Сурхондарё вилояти маркази Термиз шаҳрида жам бўлдилар.
Миллий гвардияси Сурхондарё вилояти бўйича бошқармаси масъул раҳбарлари ҳамда вилоят ҳокимлиги масъуллари, Термиз темирйўл вокзалида иштирокчиларни тантанали равишда кутиб олишди.
Иштирокчилар учун Термиз шаҳрининг диққатга сазовор жойларига саёҳат ташкил этилиб, Сурхон воҳасининг ўтмиши, бой маданий меъроси, қадриятлари ва тарихига оид батафсил маълумотлар билан яқиндан таништирилди. Бу жараёнда “Ал Ҳаким Ат Термизий”, “Султон Саодат” тарихий мажмуаларига борилиб, аждодларимизнинг порлоқ хотираси ёдга олинди.
Шунингдек, “Термиз археология музейи” ҳамда “Маданият ва тарих музейига” ташриф буюриб, музей экспонатларидан жой олган ноёб ашё ва коллекцияларда халқимизнинг минг йиллик анъаналари, қадриятлари акс этганлигининг гувоҳи бўлдилар. Ҳозирда барча тадбир қатнашчилари финал босқичга қизғин тайёргарлик кўришмоқда.
