Байрам арафасида республикамиз бўйлаб Иккинчи жаҳон уруши фахрийларининг ҳолидан хабар олиниб, уларга Президент табриги, пул мукофоти ҳамда эсдалик совғалари топширилиши давом этмоқда
Янги йил байрами олдидан Фарғона вилоятида яшовчи 13 нафар Иккинчи жаҳон уруши фахрийларининг ҳолидан хабар олиниб, уларга Президент табриги, пул мукофотлари, совғалар, озиқ-овқат маҳсулотлари топширилди.
Фарғона туманида истиқомат қилувчи Турсунбек ота Исанбеков ҳамда Фатина ая Шарипова хонадонларига ташриф буюрилиб, уруш қатнашчилари ва уларнинг оила аъзоларига Давлатимиз раҳбарининг табригини ўқиб эшиттирилди ва пул мукофотлари топширилди.
Бухоро шаҳридаги Иккинчи жаҳон уруши қатнашчилари “Шербудин” маҳалла фуқаролар йиғинида яшовчи Рейда Ресутова ва А.Ғиждувоний маҳалласида яшовчи Катизе Менсеитовалар ҳам урушнинг оловли йилларидан омон қолган кам сонли ватандошларимиздан бири. Ушбу нуроний уруш ва меҳнат фахрийлари байрам арафасида самимий қутланди ва Президентимизнинг байрам табриги ўқиб эшиттирилди. Ташриф давомида пул мукофоти ҳамда қимматбаҳо совғалар топширилди.
Кейинги манзил Бухоро шаҳрининг Чашмаю Аюб кўчаси, 9-уйда яшовчи Иккинчи жаҳон уруши қатнашчиси Аҳмад ота Муҳсинов хонадони бўлди.
Ушбу файзли хонадонда кечган суҳбатда Иккинчи жаҳон уруши ва меҳнат фронти фахрийлари давлатимизнинг доимий эътиборида экани таъкидланиб, уруш қатнашчисига самимий миннатдорлик изҳор этилди.
Президентимизнинг Иккинчи жаҳон уруши қатнашчиларига йўллаган Янги йил табриги ўқиб эшиттирилиб, пул мукофоти ва қимматбаҳо совғалар топширилди.
