БОЙМУРОДДА КЎПКАРИ БЎЙИЧА ИЛК БОР БОШҚАРМА БОШЛИҒИ КУБОГИ ЎТКАЗИЛДИ.
Мамлакатимизда от спортини ривожлантириш, унинг моддий-техник базасини мустаҳкамлаш, чавандозлар мактабларини ташкил этиш бўйича кенг қамровли ишлар амалга оширилмоқда. Шу муносабат билан, чавандозлари элга танилган Навоий вилояти Конимех тумани “Боймурод” овулида Навоий вилояти Миллий гвардия бошқармаси ҳамда Қўриқлаш бошқармаси, Улоқ-кўпкари федерацияси билан ҳамкорликда илк бор кўпкари бўйича Миллий гвардия Навоий вилояти бўйича бошқармаси бошлиғи кубоги ўтказилди. Ушбу мусобақага бутун республикамиз бўйлаб ҳамда Қозоғистон Республикасидан 300 нафарга яқин эпчил ва моҳир чавандозлар ташриф буюришиб, соврин учун кураш олиб боришди.
Ҳомийлар томонидан қўйилган совринлар учун бошланган дастлабки курашларда полвонлар эпчиллик билан ҳаракат қилишиб, совринларни қўлга киритишди.
Кубок учун бошланган шиддатли ва муросасиз баҳсларда эса қозоғистонлик чавандоз Жалдасбей Бакировнинг қўли баланд келиб, бошқарма бошлиғининг кубоги соҳибига айланди. Кўтаринки руҳда ўтказилган ушбу мусобақада полвонларимиз от устида кўрсатган маҳоратли ҳаракатлари барча томошабинларда катта таассурот қолдирди. Албатта, бу каби спорт ўйинлари ёшларни от спортига қизиқишини орттириб, соғлом авлод бўлиб етишишида муҳим рол ўйнайди.
