Тошкент вилоятида, Миллий гвардия тизимида хизмат қилиб келаётган ҳарбий хизматчи ва ходимлар ҳамда уларнинг оила аъзолари иштирокида “Мустаҳкам оила давлатнинг таянчи” мавзусида давра суҳбати ўтказилди
Пойтахтимизда жойлашган А. Навоий номидаги Миллий кутубхонада Ўзбекистон Республикаси Миллий гвардиясининг Тошкент вилоятида жойлашган бригадаси бўлинмалари ҳарбий хизматчилари ва уларнинг оила аъзолари иштирокида “Мустаҳкам оила давлатнинг таянчи” мавзусида давра суҳбати бўлиб ўтди. Унда Ўзбекистон Республикаси Миллий гвардияси масъул ходимлари, Дин ишлари қўмитаси Раисининг маслаҳатчиси И. Марипов, Оила ва хотин-қизлар қўмитаси мутахассиси С. Алимов, ҳарбий хизматчилар ва уларнинг оила аъзолари қатнашди.
Давра суҳбати давомида маърузачилар томонидан бугунги куннинг долзарб мавзуларидан ҳисобланмиш таваккалчиликка асосланган тотализатор ўйинларида иштирок этиш, ёш авлодни оммавий маданият ва интернет тармоғидаги “фильтрланмаган” маълумотларга қарши иммунитетини ошириш ҳамда оилавий ажримлар масаласи юзасидан сўз юритилди.
Дин ишлари қўмитаси Раисининг маслаҳатчиси ўз маърузасида таъкидлашича, сўнгги пайтларда онлайн қимор ўйинлари айрим тоифадаги инсонлар ҳаётининг ажралмас қисмига айланиб бормоқда. Онлайн тарзда оммалашиб, ўсмир ва ёшларни ўз домига тортаётган, миллий урф-одатларимиз ва менталитетимизга, шунингдек, диний қарашларимизга ёт бўлган қимор ўйинларига қарши курашиш йўллари нафақат маънавий, балки, ҳуқуқий жиҳатдан ҳам белгилаб олинган. Жумладан, мамлакатимизда қимор ва таваккалчиликка асосланган ўйинларни қонунга хилоф равишда ташкил этиш ҳамда ўтказиш Ўзбекистон Республикаси Жиноят кодексининг 278-моддасида жиноят сифатида белгилаб қўйилган.
Тадбир кун тартибининг яна бир муҳим масаласи, оилалар мустаҳкамлигини таъминлаш ҳамда ажримларни олдини олиш мавзуси бўлди. Оила ва хотин-қизлар қўмитаси мутахассиси томонидан оила институти жамиятнинг кичик аммо энг муҳим бўғини эканлиги алоҳида таъкидланди. Оила мустаҳкамлиги жамиятнинг тараққиёти билан боғлиқ. Давлатимиз томонидан оилавий ажримлар масаласига алоҳида эътибор қаратилгани бежиз эмас. Албатта, кундалик ҳаётимизда оилавий ажримларга сабаб бўлаётган турли омиллар мавжуд. Бугунги кунда жамиятимизда оилаларни сақлаб қолиш, ажримлар сонини қисқартириш ҳар қачонгидан муҳим аҳамият касб этмоқда.
Тадбир сўнггида эса, бўлинмалар томонидан ўтказилган 2023 йил сарҳисоб натижаларига кўра сафдошларига ўрнак бўлиб, намунали хизмат қилган ҳарбий хизматчиларнинг номлари аниқланиб, уларнинг ота-оналарига ташаккурнома ҳамда қимматбаҳо совғалар топширилди.
