Давлатимиз раҳбарининг 2022 йил 4 август кунидаги "Оилавий болалар уйлари фаолиятини такомиллаштиришга оид қўшимча чора-тадбирлар тўғрисида"ги қарорининг мазмун моҳияти мухокама қилиниб, ижроси юзасидан масъул вазирликларнинг ўзаро ҳамжиҳатликда амалга ошириладиган чора-тадбирлари белгилаб олинди.
Жорий йилнинг 10 август куни Миллий гвардия Марказий девонида Давлатимиз раҳбарининг 2022 йил 4 август кунидаги "Оилавий болалар уйлари фаолиятини такомиллаштиришга оид қўшимча чора-тадбирлар тўғрисида"ги қарорини муҳокама этиш ҳамда келгусида ҳамжиҳатликда амалга ошириладиган чора-тадбирларни белгилаб олиш мақсадида навбатдаги видео-селектор тарзидаги йиғилиш бўлиб ўтди. Мазкур йиғилишда Миллий гвардия қўмондонлиги, Вазирлар Маҳкамасининг Болаларни ҳимоя қилиш шўбаси мудири, Олий Мажлиснинг Бола ҳуқуқлари бўйича вакили (Болалар омбундсмани), Халқ таълими вазирлиги ҳамда Соғлиқни сақлаш вазирлигининг Оналик ва болаликни муҳофаза қилиш мутасадди раҳбарлари, Миллий гвардиянинг мазкур йўналишга масъул ходимлари, республикамиз бўйича фаолият юритиб келаётган 125 та оилавий болалар уйлари ота-оналари, шунингдек жойлардаги вазирликларнинг соҳага оид масъул раҳбарлари ZOOM платформаси орқали иштирок этишди.
Тадбир давомида сўз олган Миллий гвардия қўмондонлиги ва бошқа вазирлик ҳамда идоралар вакиллари томонидан мазкур қарорнинг мазмун-моҳияти, етим болалар ва ота-она қарамоғидан маҳрум бўлган болаларни қўллаб-қувватлаш соҳасидаги халқаро стандартлар ҳамда Оилавий болалар уйлари, молия-хўжалик фаолиятини амалдаги қонун ҳужжатларига мувофиқ ташкил этиш бўйича батафсил маълумотлар бериб ўтилди.
Шунингдек, ўтган давр мобайнидаги тизимда йўлга қўйилган айрим камчиликлар муҳокама қилиниб, мазкур Қарор билан барча муаммоли масалалар ўз ечимини топганлиги муҳим аҳамият касб этиши таъкидланди.
Йиғилиш давомида қабул қилинган мазкур қарорга оид жойлардаги оилавий болалар уйлари раҳбарлари ва масъул ходимлар томонидан берилган саволларга мутахассислар аниқ жавоб ҳамда маслаҳатларини беришди.
Очиқ мулоқот остида бўлиб ўтган йиғилиш якунида, кўриб чиқилган масалалар ҳамда таклифлар инобатга олинган ҳолда тегишли вазирлик мутасаддиларига топшириқлар берилди.
