"ДОВЮРАК ЖАНГЧИ": МАРДЛИК, ЖАСОРАТ ВА ЧИДАМЛИЛИК СИНОВИ
Президентимизнинг 2022 йил 10 декабрь кунидаги “Ўзбекистон Қуролли Кучлари ҳарбий хизматчиларининг жисмоний тайёргарлигини юқори даражада ташкил этиш бўйича қўшимча чора-тадбирлар тўғрисида”ги ПҚ-40-сонли қарорига асосан ҳар йили Қуролли кучлар куч тузилмаларида 15 сентябрдан 30 сентябрга қадар “Довюрак жангчи” интенсив синовлари бўлиб ўтади. Ўзбекистон Республикаси Миллий гвардияси ҳарбий қисмларида контракт бўйича хизмат қилаётган ҳарбий хизматчилар ўртасида ҳам ушбу “Довюрак жангчи” интенсив синовлари Жиззах вилояти Фориш тоғ-дала ўқув полигонида ташкиллаштирилди.
Унда қатнашган гвардиячилар ўзларининг жисмонан бақувват, чидамли, экстремал шароитларда турли жисмоний юкламаларга руҳий бардошли эканликларини машқлар жараёнида кўрсатиб беришди.
Ҳарбий хизматчилар 3 босқичли синовлардан ўтишди. I-босқичда комплекс куч машқларини бажаришди. II-босқичда - 30 км масофани пиёда юриш ва марш-югуриш орқали босиб ўтишди. Айнан шу жараёнда ҳарбий хизматчиларнинг бардошлилиги синовдан ўтказилди. Улар беш ярам соат давомида маррага етиб келишди.
III-босқичда эса ягона тўсиқлар йўлагида умумий назорат, ўқотар қуроллардан (автомат ёки тўппонча) амалий отиш ва пичоқ улоқтириш машқларини моҳирона бажаришди.
Энди машқлар жамланмасидан иборат синовдан муваффақиятли ўтган ҳарбий хизматчиларга пул мукофатлари ва “Довюрак жангчи” фарқловчи нишони топширилади. Бир сўз билан айтганда мазкур ҳарбий синовлар юқори касбий ва жисмоний малакага эга ҳарбий хизматчиларни тайёрлашнинг энг самарадор йўли ҳисобланади.