Эндиликда Миллий гвардия бўлинмаларида хизмат ўтаётган ёшлар ихтиёрий равишда ҳайдовчилик курсларида ўқиши мумкин
Ўзбекистон Республикаси Миллий гвардияси ва Ўзбекистон Республикаси мудофаасига кўмаклашувчи «Ватанпарвар» ташкилоти мутасадди раҳбарлари ўртасида ўзаро ҳамкорлик меморандум имзоланди.
Ушбу меморандумга мувофиқ эндиликда Миллий гвардия бўлинмаларида муддатли ҳарбий хизматни ўтаётган ёшлар ихтиёрий равишда «Ватанпарвар» ташкилоти тизимидаги автомототранспорт ҳайдовчиларини тайёрлаш курсларида “A”, “B”, “BC”, “C”, “D”, “E” тоифалари бўйича ва яна бешта мутахассислик, яъни вулканизаторчи, электрик-аккумуляторчи, газ-электр пайвандчи, чилангар, автоэлектрик тайёрлашга ихтисослаштирилган техник хизмат кўрсатиш курсларида ўқиш имкониятига эга бўладилар.
Меморандумда, шунингдек, ҳарбий хизматчиларни Ватанга садоқат ва юксак ватанпарварлик руҳида тарбиялашда кўмаклашиш ҳамда улар ўртасида йўл ҳаракати хавфсизлигини таъминлаш ва йўл транспорт ҳодисаларини олдини олиш бўйича тарғибот-ташвиқот тадбирларини ўтказиш белгиланган.
Бундан ташқари, мазкур ҳужжатга мувофиқ, шартнома асосидаги ҳарбий хизматчиларнинг фарзандларини мотокросс, картинг, ёзги биатлон, дуатлон, пневматик қуролдан ўқ отиш, моделизм каби спортнинг техник ва амалий турлари бўйича «Ватанпарвар» ташкилоти тизимида ташкил этилган бепул секция ва тўгаракларига жалб этилиши белгиланган.
Тадбирда сўзга чиққан икки томон мутасадди раҳбарлари томонидан «2021 йил – Ёшларни қўллаб-қувватлаш ва аҳоли саломатлигини мустаҳкамлаш йили»да бундай янги лойиҳаларни амалга оширилиши, муддатли ҳарбий хизматни якунлаган ёшларлар нафақат Ватанимиз олдидаги муқаддас бурчни адо этган бўлади, шу билан бирга, «Ватанпарвар» ташкилоти ўқув курсларида тегишли касб-ҳунар эгаси бўлишлари уларга келгуси ҳаёт қадамларида муҳим ахамият касб этишини таъкидладилар.
