“Энг илғор бошланғич ташкилот етакчиси” танлови ўз ниҳоясига етди
Жорий йилнинг 28-29 июнь кунлари пойтахтимизда Ўзбекистон Республикаси Миллий гвардиясида фаолияти йўлга қўйилган Ўзбекистон ёшлар иттифоқининг бошланғич ташкилот етакчилари ўртасида “Энг илғор бошланғич ташкилот етакчиси”танлови бўлиб ўтди.
Бошланғич ташкилотлар фаолиятини ўрганиш, етакчиларнинг билим
ва кўникмасини аниқлаб, эришган натижаларини баҳолаш ҳамда улар ўртасида ўзаро ҳамкорлик ва соғлом рақобат муҳитини яратиш мақсадида ташкил этилган мазкур танловда Қўриқлаш бош бошқармаси, ҳудудий бошқармалар, Жамоат хавфсизлиги университети ҳамда ҳарбий қисмларнинг бир нафардан энг илғор бошланғич ташкилот етакчилари иштирок этди.
Танлов давомида ҳакамлар ҳайъати томонидан жами 44 нафар иштирокчиларнинг ҳар бирини индивидуал қобилиятлари, амалга оширган лойиҳалари, тақдим этган ҳужжат ва ҳисоботлари ўрганилиб, баҳолаш мезонлари адолатли, холис
ва шаффофлик руҳида амалга оширилди.
Танловнинг иккинчи куни якуний натижаларга кўра ғолибликни қўлга киритган совриндорларни тақдирлаш маросими бўлиб ўтди.
Маросим аввалида Миллий гвардия қўмондони ўринбосари, Ўзбекистон Республикаси Ёшлар ишлари агентлиги директори ва агентлик ўринбосари, Ёшлар Иттифоқи Марказий кенгаши раиси иштирокида айни даврда ёшларга берилаётган эътибор ва яратилаётган шароитларга бағишланган Ёшлар пресс клуби ўтказилди.
Шундан сўнг, ўз касбининг моҳир усталари, касбини севиб ардоқлайдиган ҳақиқий, ватанпар ҳарбий хизматчи ва ходимлар Миллий гвардия қўмондонининг I, II ва III даражали дипломи ва бошқа қимматбаҳо совғалари билан мукофотланди.
Хусусан, “Энг илғор бошланғич ташкилот етакчиси” танловида фахрли 3-ўрин Андижон вилояти Қўриқлаш бошқармаси бошланғич ташкилот етакчиси лейтенант Солиев Шодиёрбек Яшинбек ўғлига насиб этди. Фахрли 2-ўринни бўлса Ўзбекистон Республикаси Жамоат хавфсизлиги университети бошланғич ташкилот етакчиси капитан Сатторов Асрор Акрамжонович қўлга киритди. 1-ўринни мутлоқ ғолиблик билан Миллий гвардия Қорақалпоғистон Республикаси бўйича бошқармаси бошланғич ташкилот етакчиси катта лейтенант Ражабов Жавохир Илхом ўғли эгаллади.
Шу билан бирга, танловда фаол иштирок этган бошланғич ташкилот етакчилари ташаккурнома ва қимматбаҳо совғалар билан тақдирланди.
Шунингдек, юртимизда ёшларга оид давлат сиёсатини жорий этилишида жонбозлиги ва Миллий гвардия тизими билан ўзаро ҳамкорликни йўлга қўйган давлат ва жамоат ташкилоти вакиллари жумладан, Ўзбекистон ёшлар иттифоқи Марказий кенгаши раиси Шавкат Зайниддинов, Ўзбекистон Республикаси Ёшлар ишлари агентлиги директори, сенатор Алишер Саъдуллаев ҳамда агентлик ўринбосари Каттахонова Дилноза “Маънавият аълочиси” кўкрак нишони билан тақдирланди.
Тадбир сўнггида, Миллий гвардия ансамбли хонандалари томонидан намойиш этилган бадиий чиқишлар барчага байрамона кайфият улашди.
