ЁШ ОФИЦЕРЛАРНИНГ БИТИРУВИГА БАҒИШЛАНГАН ТАНТАНАЛИ МАРОСИМ БЎЛИБ ЎТДИ
Ўзбекистон Республикаси Жамоат хавфсизлиги университетида таълим даргоҳини тамомлаган 204 нафар ёш офицерларнинг битирувига бағишланган тантанали маросим бўлиб ўтди.
Мазкур тадбирда Ўзбекистон Республикаси Миллий гвардияси қўмондони генерал-майор Р.Джураев, Ўзбекистон Республикаси Олий Мажлис Қонунчилик палатаси xалқаро ишлар ва парламентлараро алоқалар қўмитаси раисининг ўринбосари Қ. Жўраев, Президент Администрацияси ва Xавфсизлик кенгаши масъул ходимлари, Республика ва Тошкент шаҳар ҳарбий прокуратураси мутасадди раҳбарлари, Мудофаа вазирлигининг округ қўмондонлиги, Миллий гвардия таркибий ва ҳудудий бошқарма бошлиқлари, фахрийлар ҳамда кенг жамоатчилик, шунингдек битирувчиларнинг яқинлари иштирок этишди.
Тадбирнинг асосий қисмида Миллий гвардия қўмондони буйруғи ўқиб эшиттирилиб, 204 нафар битирувчиларга "Лейтенант" ҳарбий унвонлари берилганлиги эълон қилинди ҳамда уларга диплом ва кўкрак нишонлари юқорида санаб ўтилган раҳбарлар томонидан тантанали равишда топширилди.
Шундан сўнг, Миллий гвардия қўмондони Р.Джураев сўзга чиқиб, ёш офицерларни Университетни тамомлаганликлари, офицер деган шарафли номга сазовор бўлганликлари билан самимий муборакбод этиб, келгусидаги машаққатли ва масъулиятли хизматларида улкан зафарлар тилади.
Ташриф буюрган меҳмонлар ва ота-оналар номидан сўз олганлар ҳам кўзлари чақнаб турган ёш офицерларга келгусидаги хизмат фаолиятлари давомида ушбу даргоҳда олган билимларини амалиётда қўллаган ҳолда халқимизга ва Президентимизга садоқат билан хизмат қилиб, фидойиликда сафдошларига намуна кўрсата олишларига катта ишонч билдиришди.
Сўнгра ёш офицерларнинг Университет Жанговар байроғи билан хайрлашиш ва тантанали марш маросимлари бўлиб ўтди.
Курсантлар томонидан намойиш этилган Қўл жанги бўйича кўргазмали чиқишлари, буюк бобокалонларимиз Амир Темур, Жалолиддин Мангуберди ҳамда Бобур Мирзоларнинг ёш лейтенантларга қарата ўгит сўзлари акс эттирилган тарихий саҳна кўринишлари ҳамда бир гуруҳ битирувчиларнинг қизлар билан биргаликда ижро этган “Вальс” рақси тадбирга ўзгача кайфият бағишлади.
Маълумот учун: сафда турган 204 нафар ёш офицерларга ўтган давр мобайнида тажрибали профессор-ўқитувчилар томонидан мутахассисликлар бўйича замонавий моддий-техник база асосида таълим-тарбия берилди. Университетда таҳсил олиш жараёнида бўлажак офицерларнинг юксак профессионал тайёргарликка, энг илғор инновацион билим ва кўникмаларга эга бўлишларига, хорижий тилларни ўрганишларига алоҳида аҳамият берилди. Натижада битирувчиларнинг ҳарбий билим ва кўникмалари юксалиш билан бирга, уларнинг қалбида ватанпарварлик, садоқат ва матонат туйғулари шаклланди.
