ЁШ АВЛОД ТАРБИЯСИ ЙЎЛИДА...
Миллий гвардия Навоий вилояти бўйича бошқармасида ёшларни ватанпарварлик руҳида тарбиялаш мақсадида Навоий шаҳридаги “Меҳрибонлик уйи” ва 1-сонли мактаб ўқувчилари билан учрашув ташкил қилинди. “Ҳарбий хизмат билан танишиш” мавзусида ташкил қилинган мазкур тадбир ўғил-қизлар қалбида катта қизиқиш уйғотди.
Малакали ходимлар томонидан ёшларга кўргазмали чиқишлар қурол-яроғдан фойдаланиш, хизмат транспорт воситалари намойиш этилиб, она Ватанни асраб-авайлаш йўлида амалга ошириладиган машаққатли хизматнинг айрим намуналаридан мисоллар келтирилди.
Жумладан, қўл жанги, ўзини ҳимоя қилиш, жисмоний тайёргарлик машғулотлари ўқувчилар диққат эътиборини ўзига тортди. Иродани мустаҳкамлаш, сабр-тоқатли бўлишни талаб қилувчи машғулотлар ҳақиқий баркамол авлодни тарбиялашга хизмат қилиши уларга алоҳида уқтирилди. Бунинг учун чуқур билим олиш, мунтазам равишда ўз устида ишлаш зарурлиги тушунтирилди. Тадбир иштирокчилари мазкур учрашувдан маънавий қувват олдилар.
