ЁШ ОФИЦЕРЛАРНИНГ БИТИРУВИГА БАҒИШЛАНГАН ТАНТАНАЛИ МАРОСИМ БЎЛИБ ЎТДИ.
Ўзбекистон Республикаси Жамоат хавфсизлиги университетида таълим даргоҳини тамомлаган ёш офицерларнинг битирувига бағишланган тантанали маросим бўлиб ўтди.
Мазкур маросимда Ўзбекистон Республикаси Миллий гвардияси Қўмондони генерал-майор Р.Джураев, Олий Мажлис Қонунчилик палатасининг Мудофаа ва хавфсизлик масалалари қўмитаси аъзоси Т.Каримов, Хавфсизлик кенгаши ва ҳамкор вазирликлар мутасадди раҳбарлари, фахрийлар кенгаши ҳамда кенг жамоатчилик аъзолари, шунингдек, битирувчиларнинг ота-оналари ҳамда яқинлари иштирок этишди.
Тадбирнинг асосий қисмида Миллий гвардия қўмондони буйруғи билан битирувчиларга "Лейтенант" ҳарбий унвонлари берилганлиги эълон қилинди ҳамда уларга диплом ва кўкрак нишонлари топширилди. Сўнгра ёш лейтенантларнинг Университет Жанговар байроғи билан хайрлашиш ва тантанали марш маросимлари бўлиб ўтди.
Шундан сўнг, Миллий гвардия Қўмондони генерал-майор Р.Джураев сўзга чиқиб, ёш офицерларни университетни муваффақиятли тамомлаганликлари ҳамда офицер деган шарафли номга сазовор бўлганликлари билан самимий муборакбод этиб, келгусидаги фаолиятларида юксак масъулият, ҳалоллик ва камтарлик фазилатларини намоён этишларини, она Ватани, халқи ва Президентига бир умр содиқ қолишларини алоҳида таъкидлаб ўтди.
Шу билан бир қаторда, сўз олган меҳмонлар томонидан ёш офицерларга ўқув юртида олган билим ва кўникмаларини келгусида амалда самарали қўллаган ҳолда, Ватан олдидаги бурчини садоқат билан бажаришлари ва халқимизга фидокорона хизмат қилишларига ишонч билдирилди.
Тадбир давомида Университет курсантларининг кўргазмали чиқишлари ҳамда курсант қизларнинг битирувчилар билан биргаликда "Вальс" рақсини ижро этилиши тадбирга ўзгача жозиба бағишлади.
Таъкидлаб ўтиш жоизки, жорий ўқув йилида Университетни 293 нафардан зиёд ёш мутахассислар муваффақиятли тамомлади. Шулардан, 19 нафари имтиёзли диплом билан битиришга муваффақ бўлди. Сафда турган ёш офицерларга ўтган давр мобайнида тажрибали профессор-ўқитувчилар томонидан мутахассисликлар бўйича замонавий моддий-техник база асосида таълим-тарбия берилди. Муассасада таҳсил олиш жараёнида бўлажак офицерларнинг юксак профессионал тайёргарликка, энг илғор инновацион билим ва кўникмаларга эга бўлишларига, хорижий тилларни ўрганишларига алоҳида аҳамият берилди. Натижада битирувчиларнинг ҳарбий билим ва кўникмалари юксалиш билан бирга, уларнинг қалбида ватанпарварлик, садоқат ва матонат туйғулари шаклланди.
Ватан ҳимоясига отланган ушбу мард ва жасур ўғлонларга келгусидаги хизматларида улкан зафарлар тилаб қоламиз!
