ЁШЛАР УЧУН ЯРАТИЛАЁТГАН ИМКОНИЯТЛАР
Миллий гвардия Андижон вилояти бўйича бошқармаси масъул ходимлари томонидан уюшмаган ёшларни бандлигини таъминлаш, бўш вақтини мазмунли ўтказиш ва ҳарбий хизматга бўлган қизиқишларини уйғотишга қаратилган чора-тадбирлар амалга оширилмоқда.
Хусусан, жорий йилнинг 4 февраль куни Избоскан туманидаги уюшмаган ёшлар ҳамда болалар шаҳарчасида истиқомат қилаётган тарбияланувчиларни жалб қилган ҳолда “Ҳарбий қисмда бир куним” шиори остидаги очиқ эшиклар куни ўтказилди.
Ташриф буюрган иштирокчилар томонидан давлат мадҳиясини ижро этиш билан бошланган ушбу тадбир, ҳарбий хизматчиларнинг кўргазмали чиқишлари билан давом этди. Шунингдек, қурол-аслаҳа ва ҳарбий техникалар билан таништириш жараёнида ёшларни қизиқтирган саволларига мутахассислар томонидан ҳаётий мисоллар билан тушунчалар берилди.
Тадбирнинг иккинчи босқичида Маънавият ва маърифат марказида “Буюк сиймолар номи барҳаёт” шиори остида тадбир ўтказилиб, Болалар шаҳарчаси тарбияланувчилари иштирокида саҳна кўринишлари намойиш этилди.
Бу каби тадбирлардан кўзланган мақсад шоҳ ва шоир Алишер Навоий, Заҳириддин Муҳаммад Бобур, буюк саркарда Амир Темур ва Жалолиддин Мангуберди каби аждодларимиз қолдирган бой ва маданий меросни кенг тарғиб қилиш, уюшмаган ёшлар орасида мамлакатимизда амалга оширилаётган ислоҳотларда фаол иштирок этиш, юрт тинчлиги ва осойишталиги йўлида садоқат ва фидойилик билан хизмат қилишга тайёр бўлган матонатли, мард ва билимли ташаббускор ёш авлод вакиллари заҳирасини яратишдан иборатдир.
