Фарғона вилоятида “Дог биатлон” бўйича Миллий гвардия биринчилиги мусобақаси ўтказилди
Вазирлар Маҳкамасининг 2024 йилдаги “Ўзбекистон Республикаси Қуролли Кучлари кинология бўлинмаларининг фаолиятини такомиллаштириш чора-тадбирлари тўғрисида”ги қарорига мувофиқ, вазирлик ва идораларнинг кинология бўлинмаларини фаолиятини такомиллаштириш, наслчилик ишлари самарадорлигини ошириш, ветеринария хизмати фаолиятини ривожлантириш ва кинологларни малакасини ошириш кинология соҳасини ривожлантиришнинг асосий йўналишлари этиб белгиланди. Шунга мувофиқ Миллий гвардия бўлинмаларида ҳам кинология мутахассисларининг малакасини ошириш бўйича мунтазам равишда ўқув йиғинлари, ҳарбий хизматчилар ўртасида спорт мусобақалари ўтказилиб келинмоқда. Жумладан, Фарғона вилоятида 4 кун давомида Миллий гвардия кинология маркази ва дала ўқув майдонларида ўтказилган “Дог биатлон” бўйича Миллий гвардия биринчилиги мусобақасини мисол қилиб келтирсак бўлади. Унда Республикамизнинг барча вилоятларидаги бошқарма ва ҳарбий қисмлардан ташриф буюрган 50 га яқин мутахассис кинологлар 3200 м масофага хизмат итлари билан бирга якка тартибда югуриб келиб, кичик калибрли қурол билан ётган ва тик турган ҳолатда қуролдан ўқ отиш, 300 метрли масофага тўсиқларни хизмат итлари билан енгиб ўтиш, 1600 метр масофага (эстафета) жамоа таркибида югуриш каби беллашувларда ўзаро ғолиблик учун куч синашишди.
Албатта ушбу мусобақа ҳар бир ҳарбий хизматчидан чаққонликни ва зукколикни, қолаверса, ўзининг содиқ дўсти, ҳамроҳини ҳам унутиб қўймасликни талаб қилади. Ушбу қоидаларга амал қилган Фарғона, Жиззах, Сурхондарё ва Тошкент вилоятларидан қатнашган иштирокчилар якунда мос равишда ғолибликни қўлга киритишди.
Мусобақанинг яна бир диққатга сазовор жиҳати, унда қизларнинг ҳам иштирок этганидир. Йигитлар билан елкама-елка туриб, улардан қолишмаган тарзда шартларни моҳирона бажарган қизлар, барчада катта таассурот қолдирди.
Мусобақа якунида ғолиб жамоалар ташкилотчилар томонидан кубок, диплом, медал ва эсдалик совғалари билан муносиб тақдирланди. Зеро, ҳар бир ҳарбий хизматчи кинолог албатта ватанимизнинг тинчлиги, осойишталиги ва хавфсизлиги йўлида ўзига ишониб топширилган вазифаларни моҳирона бажарадилар. Ўтказилган мусобақа нафақат беллашув қолаверса, тажриба алмашиш йўлидаги кўприк вазифасини ҳам ўтаб берди.
