Афсуски сўнгги кунларда мактабларда ўқувчиларни ватанпарварлик руҳида тарбиялаш орқали уларда ҳуқуқбузарликка қарши иммунитет яратиш бўйича янгича тизимни яратиш бўйича амалий ислоҳотлар айримларга ёқмаётган, уларни қониқтирмаётган экан.

Ўтган 2023 йилда вояга етмаганлар 3,5 минг жиноят содир этгани, 50 минг нафар бола мунтазам равишда мактабга бормаётгани тез-тез муҳокама қилиниб, Миллий гвардияга Мактабгача ва мактаб таълими вазирлиги билан ҳамкорликда мактабларда давоматни таъминлаш топширилганди. Шунингдек, Миллий гвардия бошқа вазирлик ва идоралар билан ҳамкорликда ўқувчиларнинг бўш вақтларини мазмунли ўтказиш, касбга йўналтириш, тарбиялаш бўйича ота-оналар, маҳалла фаоллари билан ҳамкорликда иш олиб бориш тизимини яратиш бўйича вазифаларни белгилаб берганидан барчамиз ҳабардормиз.

Қисқа муддат ичида жойларга чиққан ҳолда манзилли чора-тадбирлар бошланиб, сурункали равишда дарсга келмайдиган, тарбияси ва ўқишида муаммоси бўлган ўқувчилар, Миллий гвардиядан бириктирилган ҳодимлар ҳамда инспектор-психологлар томонидан ўрганилиб “мактаб – ота-она – маҳалла” занжири асосида, ота-оналар ва маҳалла фаолларини масъулиятини ошириш бўйича қилинган сай-ҳаракатлар натижасида ижобий ўзгаришлар кузатила бошлади.

Бироқ, айрим интернет сайтлари ва ижтимоий тармоқларда баъзи блогерлар бунга ўзларининг салбий қарашлари ҳамда бир қатор асоссиз фикрлари билан изоҳлар, мақолалар ёзишдан ҳам тийилмаяпти.

Шу ўринда уларга нисбатан савол туғилади, агар ҳақиқатдан ҳам – ёшлар, мактаб ўқувчилари, яъни Янги Ўзбекистонимизнинг келажагига бефарқ эмас экансиз! Нега ҳозирги кундаги Президентимиз бот-бот такрорлайдиган очиқлик ва шаффофлик тамойилларига риоя қилган ҳолда, Миллий гвардия ёки Мактаб ва мактабгача таълим вазирлигининг расмий вакилларидан тушунтириш олмасдан, қандайдир номлар ортига бекиниб “пост” ёзиш билан шуғулланмоқдасиз.

Бир мақолада “Таълим тўғрисида”ги қонунда Миллий гвардиянинг давомадни текширишдаги иштироки йўқ эканлиги, педагогик жараёнларга аралашувлар ноқонуний эканлиги келтирилган.

Агар мақола муаллифи асоссиз уйдирма ёзган бўлса бизнинг муаллифга асосли айтар сўзимиз бор. Муаллиф “Таълим тўғрисида”ги қонунни ўқигану аммо “Ўзбекистон Республикаси Миллий гвардияси тўғрисида”ги қоннуни назардан четда қолдирган. Аслида мазкур қонуннинг 3-моддасида - Миллий гвардия Ўзбекистон Республикасининг қонунларига ва Ўзбекистон Республикаси Президентининг топшириғига мувофиқ бошқа вазифаларни ҳам бажариши мумкин деб аниқ белгилаб қўйилган.

Мақолада шунингдек, “Мактабларда педагоглар етишмаслиги сабабли – Миллий гвардия ходимлари педагогик маълумотга эга бўлмасдан туриб болаларни тарбиялашга жалб қилинаётган бўлса, докторлар ҳам етишмайди – шифохона ва поликлиникаларга ҳам нимага жалб қилинмайди” дея саволни ўртага ташлаган.

Шуни билингки, Миллий гвардия мактабдаги педагогик жараёнга аралашмайди, унинг вазифаси аксинча мактабда сабабсиз сурункали дарс қолдирадиган, тарбияси ва ўқишида муаммоси бўлган болалар билан шуғулланиш, эҳтимолли ҳуқуқбузарликларларни барвақт олдини олишдан иборат. Зеро “Ҳуқуқбузарликлар профилактикаси тўғрисида”ги қонуннинг 9-моддасида “Ҳуқуқбузарликлар профилактикасини бевосита амалга оширувчи органлар ва муассасалар тизими” сифатида Миллий гвардия ҳам қайд этилган.

Шундай экан биз бўлар-бўлмас фисқу-фасод қилмаймиз. Биз қонун билан гапирамиз!