ҲЕЧ КИМ ЭЪТИБОРДАН ЧЕТДА ҚОЛМАС
Меҳр-мурувват бу биз бир-биримизга улашишимиз зарур бўлган энг муқаддас туйғу. Бу туйғуни ҳамма баравар сезади, хоҳ ёш бўлсин, хоҳ кекса, хоҳ соғлом бўлсин, у хоҳ хаста.
Юртимизда ижтимоий ҳимояга муҳтож инсонларга алоҳида эътибор қаратилиши ҳеч кимга сир эмас. Бу борада кўплаб давлат ва нодавлат ташкилотлар томонидан амалга оширилаётган саховат ишлари мисол бўла олади.
Хусусан, куни кеча Сирдарё вилояти Сирдарё тумани "Мурувват" ногиронлиги бўлган шахслар учун аёллар интернат уйида вилоят Миллий гвардия бошқармаси ҳарбий хизматчилари ҳамда Миллий гвардия Маънавият ва маърифат маркази ашула ва рақс ансамбли хонандалари билан биргаликда "Сен азиз ва мўътабарсан муқаддас аёл" шиори остида байрам тадбири ташкил этилди.
Тадбир давомида хонандалар томонидан куй-қўшиқлар куйланиб, "Мурувват" уйи аёлларига байрамона кайфият улашилди.
Шу билан бирга, бу каби тадбир Бахт шаҳрида жойлашган Республика ўғил болалар ўқув-тарбия муассасида ҳам ташкиллаштирилиб, тарбияланувчилар учун мусиқий байрамона дастур ҳавола этилди. Шўх тароналар барчага баҳорий кайфият, шодлик бахш этди.
