ХОТИН-ҚИЗЛАРНИ ҲАР ТОМОНЛАМА ҚЎЛЛАБ-ҚУВВАТЛАШ ДОИМО ЭЪТИБОР МАРКАЗИДА
Юртимизда ижтимоий аҳволи ва турмуш шароити оғир, ишсиз ва ижтимоий фаол бўлмаган хотин-қизларни ҳар томонлама ижтимоий қўллаб-қувватлаш ва ҳимоя қилиш, уларга давлат томонидан манзилли тарзда кўмаклашиш борасида тизимли ишлар йўлга қўйилган. Хусусан, бу каби ишларнинг амалий давоми сифатида куни кеча Миллий гвардия Сурхондарё вилояти бўйича бошқармаси ҳарбий хизматчилари Термиз шаҳри “Шодлик” маҳалла фуқаролар йиғинида аёллар билан психологик тренинг ташкил этдилар.
Миллий гвардия бошқармаси психолог ҳарбий хизматчилари маҳалла раиси ва оила хотин-қизлар ижтимоий-маънавий масалалар бўйича раис ўринбосари билан ҳамкорликда аёлларнинг психологик ҳолати, оилавий ва турмуш аҳволини ўрганиб, руҳий ҳолати тушкун бўлган фуқаролар билан етти босқичдан иборат психологик машғулотлар ўтказилди.
Машғулотлар давомида фуқаролар билан уларнинг муаммолари ва ғам-ташвишлари, руҳий ҳолатларига таъсир қилаётган омиллар бўйича эркин мулоқотга киришилди. Иштирокчиларга мутахассислар томонидан психологик стресс ёки зўриқишдан халос бўлиш, руҳий енгиллик ва ижобий кайфиятни юзага келтириш бўйича кўрсатмалар берилди.
Бу каби тренинглар яқинларини йўқотган ёҳуд дардлашувчи инсонга муҳтож фуқароларимизга тўғри йўналиш бериш, уларга ўзларига бўлган ишонч, ҳаётга муҳаббат ҳосил қилишга хизмат қилади. Зеро, аёлларимиз нозик хилқат вакилларидир. Уларга эътибор ва меҳр даркор.
