ИЖТИМОИЙ ҲИМОЯГА МУҲТОЖ БОЛАЛАР ТАЪЛИМ-ТАРБИЯСИ БЎЙИЧА ЯНГИ ТИЗИМ ЖОРИЙ ЭТИЛАДИ
Юртбошимиз раислигида 28 июль куни ногиронлиги бўлган, ота-она қарамоғидан маҳрум ва етим болаларни давлат томонидан қўллаб-қувватлашни кенгайтириш бўйича ўтказилган видеоселекторда аниқ вазифалар ва мақсадли йўналишлар белгилаб берилди.
Мазкур йиғилишда давлатимиз раҳбари Меҳрибонлик уйларидаги болаларни оилага яқин муҳитда тарбиялаш, билим ва маънавиятли, ватанпарвар инсонлар этиб вояга етказиш зарурлигини таъкидлади.
Шу мақсадда бу борада янги тизим жорий қилиниши белгиланди. Унга кўра, 16 та Меҳрибонлик уйи ва 4 та Болалар шаҳарчаларидаги ёшларнинг таълим-тарбиясига Ўзбекистон Республикаси Миллий гвардияси масъул этиб белгиланди.
Бугунги кунда Миллий гвардия тизимининг барча бўғиндаги раҳбарлари юртбошимиз томонидан билдирилган ишончни ҳис қилган ҳолда, масъулиятли ва шарафли вазифани бажаришга киришдилар.
Ушбу йўналишдаги ишларни тизимли йўлга қўйиш ҳамда янги босқичга олиб чиқиш мақсадида Миллий гвардия қўмондони генерал-майор Р.Джураев жорий йилнинг 30 июль куни Олий Мажлиснинг Инсон ҳуқуқлари бўйича (омбудсман) ўринбосари - Бола ҳуқуқлари бўйича вакили, Тошкент шаҳар ҳокимлиги, Халқ таълими вазирлиги ва Бош прокуратура мутасадди раҳбарлари, шунингдек ҳудудий ва шаҳар васийлик органи мутахассислари билан учрашиб бир қатор масалалар муҳокама қилинди.
31 июль куни эса Миллий гвардия қўмондони пойтахтимизда Оилавий болалар уйи ташкил қилиш истагида бўлган уч нафар фуқаро К.Атаева, Ф.Утешова ва У.Турдалиеваларни ушбу йўналишга масъул мутасадди раҳбарлар ҳамда мутахассис ходимлар иштирокида қабул қилди.
Учрашув очиқ мулоқот тарзида бўлиб ўтди. Оилавий болалар уйи ташкил қилиш истагида бўлган ушбу фуқароларнинг таклифлари ва режалари шунингдек, мутахассислар томонидан билдирилган ҳуқуқий-меъёрий ҳужжатлар талаблари доирасидаги фикрлари тингланди.
Миллий гвардия қўмондони ушбу фуқароларга хайрли ишга қўл ураётганликлари учун ўз миннатдорчилигини билдирди. Уларга Оилавий болалар уйи ташкил қилишлари учун қисқа муддатларда барча зарур шарт-шароитлар яратиб берилишини ишонч билан таъкидлаб, тегишлилиги бўйича масъул ходимларга топшириқлар берди.
