“Янги Ўзбекистоннинг спортчи ҳарбийлар оиласи” мусобақасининг ғолиблари аниқланди
Миллий гвардия бўлинмаларида ҳарбий хизматчи ва ходимлар ва уларнинг оила аъзолари орасида соғлом турмуш тарзини тарғиб қилиш ва ўсиб келаётган ёш авлоднинг жамиятда ўрнини топишида ҳамда уларни ўз иродаси, кучи ва имкониятларига бўлган ишончни мустаҳкамлаш борасида кенг қамровли тадбирлар амалга ошириб келинмоқда.
Жумладан куни кеча Миллий гвардия бўлинмалари ҳарбий хизматчи ва ходимлари ўртасида ўтказилган “Янги Ўзбекистоннинг спортчи ҳарбийлар оиласи” мусобақасининг Республика босқичи ана шундай тадбирларнинг навбатдагиси ҳисобланади.
“Янги Ўзбекистоннинг спортчи ҳарбийлар оиласи” мусобақаси икки босқичда ташкил этилди. Даставвал ҳудудий бошқармаларда ғолиблар аниқланиб, кейинги Республика босқичига йўлланма олган 16 та ҳарбийлар оиласи пойтахтимизда ўтказилган финал мусобақасида ўзаро куч синашишди.
Икки кун давомида бўлиб ўтган мусобақаларда жамоалар ўзларини таништириш, камондан отиш, эстафета, турникда тортиниш, баскетбол ва футбол элементларини бажариш бўйича ғолиблик учун беллашишди.
Тантанали тақдирлаш маросимида Миллий гвардия қўмондонлиги, Республика Оила ва хотин-қизлар қўмитаси раиси, Маънавият ва маърифат маркази вакиллари ва таниқли спортчилар иштирок этишиб, ғолибларни эришган натижалари билан табриклашди.
Ушбу мусобақада 3-ўринга Миллий гвардиянинг Тошкент вилоятида жойлашган махсус вазифаларни бажарувчи бригадаси ҳарбий хизматчиси II-даражали сержант Бахшулло Қосимовлар оиласи, 2-ўринга эса Миллий гвардия Фарғона вилояти бўйича бошқармаси ҳарбий хизматчиси сержант Дилбек Очиловлар оиласи муносиб деб топилди. Фахрли 1-ўринни Миллий гвардия Жиззах вилояти бўйича бошқармаси ҳарбий хизматчиси сержант Қахрамон Нишоновлар оиласи қўлга киритди.
Тадбир давомида ғолиб ва совриндорларга ҳамда номинациялар бўйича энг яхши деб топилган жамоаларга ташкилотчиларнинг диплом ва совғалари топширилди.
Хулоса ўрнида шуни айтишимиз мумкинки, бу каби спорт мусобақалари орқали ҳарбий хизматчилар ва уларнинг оила аъзоларида мардлик ва ватанпарварлик, она Ватанга садоқат туйғулари шаклланишига ишончимиз комил!
