Янгиликлар

Қуролли кучлар тизимида жамият ва давлат хавфсизлигини таъминлаш, мамлакатимиз аҳолисини терроризм, жиноятчилик ва бошқа ноқонуний хатти - ҳаракатлардан ҳимоя қилишга қодир бўлган махсус ҳарбий тузилма -Ўзбекистон Республикаси Миллий гвардияси ташкил этилгани мамлакатимизда инсон ҳуқуқларини таъминлаш соҳасида тарихий воқеа бўлди. Давлатнинг ички хавфсизлиги, аксинча, уни таъминлаш кўплаб хавфсизлик тузилмаларининг устувор вазифасидир. Шу муносабат билан Ўзбекистон Республикаси миллий гвардияси ҳарбий ташкилот бўлиб, унинг асосий мақсади хавфсизликни таъминлаш, шунингдек, Ўзбекистон Республикаси фуқароларининг эркинликлари ва ҳуқуқларини таъминлашдир.

Бугунги кунда Миллий гвардия, ички ишлар органлари ва жамоат ташкилотларининг жамоат тартибини сақлаш ва шахс, жамият ва умуман давлат хавфсизлигини таъминлаш борасидаги қўшма фаолияти мамлакатимиз давлат ва жамоат хавфсизлигини таъминлаш тизимидаги ҳуқуқни муҳофаза қилиш органи сифатида талаб ва ишончлиликни исботлаб келмоқда. Ушбу соҳанинг ислоҳотларини изчил давоми сифатида Ўзбекистон Республикаси Президентининг 2021 йил 15 апрелдаги “Жамоат хавфсизлигини таъминлаш соҳасида профессионал кадрларни тайёрлаш тизимини такомиллаштириш чора-тадбирлари тўғрисида”ги қарорига мувофиқ Миллий гвардия Ҳарбий-техник институти Ўзбекистон Республикаси Жамоат хавфсизлиги университети этиб қайта ташкил этилиши мантиқий асос бўлиб, ушбу тизимга кадрларни тайёрлаб бериш масаласи куннинг долзарб масаласига айланди.

Бугунги кунда мамлакатимизда кечаётган жараёнлар, ўзгаришлар, аниқроғи кун сайин ошиб бораётган аҳолимиз сони барча ҳуқуқни муҳофаза қилувчи идоралар ходимларини бефарқ қолдирмаяпти. Чунки янгидан-янги вазифалар юклатилиши билан бирга ушбу шаҳар ва туманларимизда халқ осойишталигини сақлаш, тинч аҳолини фаровон турмуш кечиришини таъминлаш, ҳуқуқбузарлик ва жиноятчиликка қарши кураш олиб бориш борасида бугунги замон олдимизга бир қатор ўзининг талабларини қўймоқда. Шундан келиб чиқиб, мамлакатимиз иқтисодий ўсишини ҳамда ишлаб чиқариш корхона ва ташкилотлар фаолиятларини тўлақонли олиб боришлари учун зарур бўлган шарт-шароитларни яратиб бериш мақсадида Миллий гвардия тасарруфидаги таркибий бўлинмалар ҳарбий хизматчилари ўз мажбуриятларини сидқи-дилдан олиб боришмоқда. Ушбу бўлинмаларга мутахассис кадрларни тайёрлаш мақсадида ҳозирда университетда нафақат Миллий гвардия таркибий бўлинмаларига қолаверса, Мудофаа вазирлиги, Ички ишлар вазирлиги ва бошқа турдош куч тузилмаларига ҳам етук малакали мутахассис офицер кадрларни тайёрлаб келмоқда.

Минтақадаги ҳарбий-сиёсий вазиятнинг характери ҳарбий кадрларимиздан ғоявий тобланганлик ва сиёсий етукликни, миллий истиқлол ғоясига садоқатли бўлишни, юксак касбий маҳорат эга каби фазилатларни уларда шакллантириш борасида университет профессор-ўқитувчилари томонидан кенг кўламли ишлар амалга оширилиб келинмоқда. Бундан ташқари тайёрланадиган кадрларимизни маънан етук ва жисмонан бақувват бўлишлари учун университетда курсантлар учун барча зарурий шарт-шароитлар яратилган, жумладан замонавий жиҳозланган ўқув аудиториялар ва махсус жиҳозланган ўқув синфлари, халқаро стандартларга жавоб берадиган ахборот-коммуникацион технологиялар кенг жорий қилинган, шу билан бирга назарий машғулотларни амалий дарслар билан уйғунлаштириш мақсадида криминалистика ва имитацион-ўқув полигонлар ҳам барпо этилган, компьютер-тренажерларда тактик-ўқувларни ўтказиш имкониятини берадиган замонавий ситуацион марказ ҳам ташкил этилган, бундан ташқари кенг ва шинам, ҳамда барча шароитларга эга бўлган курсантлар ётоқхонаси бинолари, курсантлар овқатланишлари учун бир вақтнинг ўзида 1200 кишини қамраб оладиган ошхона, спорт майдонлари, чавандозлик машғулотларини ўтказиш учун мўлжалланган махсус ўқув объектлари ва бир қатор бошқа объектлар барпо этилган. Курсантлар бўш вақтларини мазмунли ўтказишлари учун турли хил мутахассисликлар бўйича ҳарбий-илмий тугараклар ва бой маънавий-маданий турдаги меъросга эга бўлган катта кутубхона, бу ерда ўн мингдан зиёд замонавий бадиий ҳамда ўқув адабиётлар жамланмаси ва мингдан ортиқ электрон ўқув дарсликлар заҳираси тўпланган. Ҳозирда университетда қуйидаги йўналишларда мутахассис кадрларни тайёрлаш кўзда тутилган, жумладан:

махсус вазифаларни бажариш қўшинларининг қўмондонлик-тактик фаолияти;

иқтисодий хавфсизлик;

хизмат фаолиятини тарбиявий-психологик таъминлаш;

аниқлаш ва қўриқлаш тизимлардан фойдаланиш бўйича қўмондонлик-муҳандислик фаолияти;

хавфсизликни ҳуқуқий таъминлаш;

ҳалқаро ҳарбий ҳамкорликни ҳуқуқий таъминлаш;

қўриқлаш бўлинмаларининг қўмондонлик-тактик фаолияти;

йўл-патруль хизматининг қўмондонлик тактик тактик фаолияти;

патруль-пост хизматининг қўмондонлик тактик тактик фаолияти;

паспорт тизимини ҳуқуқий таъминлаш.

Хулоса қилиб айтганда, Ўзбекистон Республикаси Жамоат хавфсизлиги университети қисқа муддат ичида нафақат мамлакатимиздаги олий нуфузга эга бўлган таълим муассасига айланади, балки Марказий Осиёдаги энг нуфузли олий таълим муассаларидан бири бўлиб айланишига хеч шубҳамиз йўқ. Яқин истиқболда мамлакатимиз Қуролли Кучлари ва барча куч тузилмаларига замонавий билимларга эга, ҳар томонлама етук малакали офицер кадрларни тайёрлаб бериш зиммасидаги вазифани шараф билан адо этамиз деб ишонтира оламиз. 

полковник Бойбутаев Жахонгир Жуманазар ўғли,

ҳ.ф.ф.д.(PhD), доцент Ахборот-таҳлилий фаолият кафедраси бошлиғи