ЖАСОРАТИНГИЗНИ ВАТАН ШАРАФЛАЙДИ
Иккинчи жаҳон уруши даҳшатларининг гувоҳи ва иштирокчиси бўлган қаҳрамонлар сафи тобора камайиб бормоқда. Уларни қадрлаш ва йўқлаш ҳар бир инсоннинг бурчидир. 9-май Хотира ва қадрлаш куни муносабати билан жойларда турли тадбирлар ва фахрийлар хонадонига ташрифлар уюштирилади. Хусусан, куни кеча Миллий гвардия Тошкент шаҳри бўйича бошқармаси ҳарбий хизматчилари томонидан Чилонзор туманида истиқомат қилувчи Ганиев Абдужалил ота холидан хабар олинди. Болалиги урушнинг сурурли йилларида ўтган қаҳрамонимиз айни кунларда фарзандлари, неваралари даврасида кексалик гаштини сурмоқда.
Юзма-юз суҳбат чоғида уруш фахрийси дунё халқлари бошига мусибат солган машъум уруш, ўша оғир кунларни матонат билан енгиб ўтган ота-боболаримизнинг енгилмас иродаси, чексиз матонати ҳақида сўзлаб берди. Ёшларга бугунги тинч-осойишта кунларга осонликча эришилмагани, уни кўз қорачиғидек асраб-авайлаш лозимлиги юртимизда яратилган шароит ва имкониятлардан тўла фойдаланган ҳолда чуқур билим олиш, яхши касб эгаси бўлиш, шу орқали Ватанимиз тараққиёти учун ҳисса қўшиш ёш авлоднинг муқаддас бурчи эканлигини таъкидлади.
Ташриф сўнгида Абдужалил ота кўрсатилган эътибор ва ташрифдан миннатдор эканлигини, бугунги тинч ва фаровон ҳаётимизнинг қадрига етган ҳолда, уни кўз қорачиғимиздек асраб-авайлаш кераклигини айтиб ўтди.
