ЮКСАК МАРРАЛАРГА СОҒЛОМ РАҚОБАТ БИЛАН ЭРИШИЛАДИ
Жорий йилнинг 23 январь куни Ўзбекистон Республикаси Миллий гвардияси қўмондонлиги ташаббуси билан ёшлар орасида соғлом ахлоқий-руҳий муҳитни қарор топтириш, қобилиятларини ва бадиий қизиқишларини юзага чиқариш мақсадида Бахт ўғил болалар ўқув-тарбия муассасасида “Ким Ватанга содиқ бўлса, мендурман ўша!” шиори остида “Қувноқлар ва зукколар” маданий-маърифий кўнгилочар тадбири ташкиллаштирилди.
Танловда ҳар бири 10 нафар ўқувчилардан иборат учта жамоа – Тошкент Темурбеклар мактаби ҳарбий-академик лицейи, Республика ихтисослаштирилган мусиқа академик лицейи ва Бахт ўғил болалар ўқув-тарбия муассасаси жамоалари иштирок этди.
Мусобақа давомида иштирокчилар ўз билими, топқирлиги ва бадиий чиқишлари билан берилган шартларни бажардилар. Барча жамоаларнинг тезкор жавоблари ва саҳна кўринишлари ҳайъат аъзолари томонидан адолатли равишда баҳоланиб борилди.
Мусобақа натижаларига кўра Республика ихтисослаштирилган мусиқа академик лицейи жамоаси 3-ўринни, Тошкент Темурбеклар мактаби ҳарбий-академик лицейи жамоаси 2- ўринни ва Бахт ўғил болалар ўқув-тарбия муассасаси жамоаси 1-ўринни қўлга киритди. Ғолиблар ва фаол иштирок этган ўқувчилар Миллий гвардия қўмондонлигининг эсдалик совғалари билан тақдирландилар.
