Урганчлик устозлар Нураддин Шарифбоевич ва Нилуфар Ахмеджоновналарнинг орзулари доим юксак бўлган. Улар турмуш қурган кундан бошлаб, Меҳрибонлик уйидаги болаларни оиласи бағрига олишга келишиб олишган. 2021 йил ноябрь ойида Давлатимиз Раҳбари ташаббуси билан Етим ва ота-она қарамоғидан маҳрум бўлган болаларни давлат томонидан қўллаб-қувватлашнинг тубдан янгиланган тизими жорий этилганидан сўнг, улар ниҳоят ўз мақсадларини амалга оширишга муваффақ бўлиб, уч қиз ва тўққиз ўғилнинг бахтли ота-онасига айланди.
Нураддин Шарифбоевич ва Нилуфар Ахмеджоновна болаларни “ўзимизники” ва “асраб олинган” деб ажратмасдан “бизнинг фарзандларимиз” деб атайди.
Аммо яқинда аҳил оиланинг бошига мусибат тушди: 17 ёшли Зафарбек оғир хасталикка чалинганлиги маълум бўлди. Хавотирга тушган ота-она ёрдам сўраб Миллий гвардияга мурожаат қилди. Шундан сўнг, Зафарбек Тошкентга олиб келиниб, энг яхши ихтисослаштирилган тиббиёт муассасаларидан бири – Республика ихтисослаштирилган гематология илмий-амалий тиббиёт маркази ҳузуридаги болалар гематологияси, онкологияси ва клиник иммунология марказига даволаниш учун жойлаштирилди. Миллий гвардия Тиббиёт бошқармаси бошлиғи полковник Умарбек Юсупов ва Марказий амбулатория бошлиғи катта лейтенант Шаҳноза Мирсогатовалар ҳар куни ўсмирнинг ҳолидан хабар олишди.Шифокорлар даволаниш жараёни, қандай дори-дармонлар кераклиги билан танишиб, Миллий гвардия қўмондонига маълумот бериб боришди. Ҳарбий хизматчилар ҳам бугунги синовли кунларда ўғли учун ёрдам ва ғамхўрлик сўраб турган Зафарбекнинг ота-онасига маънан ҳамда амалий ёрдам бериб, қўллаб-қувватлашмоқда.
Куни кеча Миллий гвардия қўмондони генерал-майор Рустам Джураев Зафарбекдан хабар олиш ва тиббиёт ходимлари билан суҳбатлашиш учун марказга ташриф буюрди. Суҳбат чоғида қўмондон Зафарбекдан тузалиб чиққанидан сўнг олдига қўйган мақсад ва режалари ҳақида сўради. Ўсмирнинг Ватанга хизмат қилиш мақсади борлигини эшитган генерал бош кийимини ечди ва “Мен сени доимо қўллаб-қувватлайман, ишончим комилки,сен албатта генерал бўласан!” деб унинг бошига кийдирди. Шунингдек, у Зафарбекнинг тезроқ соғайиб кетишини тилаб, ҳар қандай вазиятда ҳам жасорат ва ўз кучига бўлган ишончини йўқотмаслигини маслаҳат берди. Хайрлашув чоғида дори-дармон ва барча зарур нарсалар билан қўллаб-қувватлашга тайёрлигини билдирди.
Марказ директори Абдулла Абдиҳакимов ва болакайга масъул шифокор даволаниш жараёни, керакли дори-дармонлар ҳақида маълумот берди. Миллий гвардия тиббиёт хизмати бошлиқларига Марказ тиббиёт ходимлари билан доимий алоқада бўлиб туриш, боланинг аҳволи, қандай дори-дармонлар зарурлиги ҳақида хабардор қилиш бўйича топшириқлар берилди.