Ўзбекистон ҳуқуқни муҳофаза қилувчи органлари қўл жанги федерацияси раиси - Миллий гвардия қўмондони Р.Джураев томонидан Остона шаҳрида бўлиб ўтган “Қўл жанги бўйича Жаҳон Кубоги” мусобақасида фахрли 1-ўринни эгаллаган спортчилар ва уларнинг мураббийлари  муносиб рағбатлантирилди.

Аввал хабар берганимиздек, жорий йилнинг 20-23 ноябрь кунлари Қозоғистон Республикаси пойтахти Остона шаҳрида қўл жанги спорти бўйича Жаҳон кубоги бўлиб ўтди.

Эркаклар ва аёллар ўртасида бўлиб ўтган мазкур Жаҳон кубогида Қозоғистон, Қирғизистон, Ўзбекистон, Россия, Тожикистон, Мўғулистон, Ҳиндистон, Швейцария, Марокаш, Италия, Молдова, Испания, Руминия, Миср, Тунис, Беларусь, Жанубий Корея, Хитой, Япония ва Туркманистон каби 15 та давлатдан 200 нафардан ортиқ спортчилар иштирок этди.

Спортчиларимиз мусобақада 10 та олтин, 8 та кумуш, 6 та бронза медалларини қўлга киритиб, муросасиз беллашувлар якунига кўра умумжамоа ҳисобида фахрли 1-ўринни эгаллашди.

Бугун шу муносабат билан Ўзбекистон ҳуқуқни муҳофаза қилувчи органлари қўл жанги федерацияси биносида терма жамоа мураббийлари ва спортчиларини тантанали тақдирлаш маросими бўлиб ўтди.

Маросимда, Ўзбекистон ҳуқуқни муҳофаза қилувчи органлари қўл жанги федерацияси раиси, Миллий гвардия қўмондони генерал-майор Р.Джураев, тегишли бошқарма бошлиқлари,  Спорт вазирлиги, Қўл жанги федерацияси масъуллари ҳамда терма жамоа аъзолари иштирок этди.

Тадбир аввалида Федерация раиси спортчиларни нуфузли халқаро мусобақада муваффақиятли иштирок этиб, фахрли биринчи ўринни қўлга киритганлиги билан муборакбод этди.

Шунингдек, Давлатимиз раҳбарининг “Қўл жанги спорт турини янада ривожлантириш чора-тадбирлари тўғрисида”ги қарорига асосан ёшларнинг қўл жанги спорт тури билан шуғулланишлари учун барча шарт-шароитлар яратиб берилиши натижасида қисқа давр ичида спортчилар фақатгина катта ғалабалар билан юртимизга қайтаётганлиги алоҳида эътироф этилди.

Шундан сўнг, Миллий гвардия қўмондони буйруғи ўқиб эшиттирилиб унга кўра, совринли ўринларни қўлга киритган тажрибали спортчилар ҳамда мураббийлар муносиб рағбатлантирилди.