“Маънавият ва маърифат ишлари аълочиси” кўкрак нишонлари ўз эгаларига топширилди
Пойтахтимиздаги Абдулла Қодирий мемориал музейида Миллий гвардия ҳарбий хизматчи ва ходимлари ҳамда ҳамкор ташкилотлар вакиллари иштирокида тантанали тадбир бўлиб ўтди.
Тадбир аввалида Миллий гвардия қўмондонининг тарбиявий ишлар, кадрлар ва ёшлар масалалари бўйича ўринбосари, полковник С.Мамаюсупов нутқ сўзлади. У ўз нутқида Миллий гвардия томонидан Давлатимиз Раҳбарининг “Агар жамият ҳаётининг танаси иқтисодиёт бўлса, унинг жони ва руҳи маънавиятдир” сўзлари дастурамал сифатида қабул қилиниб, тизимда маънавий-маърифий ишлар самарадорлигини ошириш, ёшларни спортчи ва ҳарбий ватанпарварлик руҳида тарбиялашга алоҳида эътибор қаратилаётганлигига урғу берди.
Шундан сўнг, қўмондон ўринбосари томонидан Қуролли Кучлар тизимида маънавий-маърифий ишлар самарадорлигини оширишга муносиб ҳисса қўшган ҳарбий хизматчилар ва фуқароларни рағбатлантириш мақсадида таъсис этилган “Маънавият ва маърифат ишлари аълочиси” кўкрак нишонлари тантанали равишда ўз эгаларига топширилди.
Шу билан бирга, армия ва халқ бирлигини таъминлашда фаол ҳамкорлик қилган давлат ташкилотлари вакиллари, хусусан, Республика Маънавият ва маърифат маркази, Мактабгача ва мактаб таълим вазирлиги, Ёшлар ишлари агентлиги масъул ходимлари ҳам тадбирда муносиб тақдирланди.
Ишонамизки, буларнинг барчаси келгусида ҳарбий хизматчи ва ходимлар, айниқса, ёшлар билан ўтказиладиган маънавий-маърифий ишлар самараси ва таъсирчанлигини оширишга ҳамда уларни юксак маънавиятли ватанпарвар ходим сифатида тарбиялашга хизмат қилади.
