МАРД АСКАР – ЁШЛАРГА НАМУНА!
Жорий йилнинг 23 январь куни Ўзбекистон Республикаси Миллий гвардияси Қўриқлаш бош бошқармаси ҳамда Ўзбекистон касаба уюшмалари федерацияси томонидан "Мард аскар – ёшларга намуна!" шиори остида концерт дастури ташкиллаштирилди.
Унда Миллий гвардия ҳарбийлари, Қўриқлаш хизматининг Тошкент шаҳри ва Тошкент вилоятларидаги бўлинмаларининг ходимлари ва уларнинг оила аъзолари, "Бахт" мактаби тарбияланувчилари ҳамда бир гуруҳ фаол ёшлар иштирок этди.
Тадбир аввалида, Миллий гвардия Қўмондони ўринбосари, Қўриқлаш бош бошқармаси бошлиғи полковник М.Ғаниев сўзга чиқиб, ходимлар ва уларнинг оила аъзоларининг дам олиш вақтларини мароқли ўтказишларини таъминлаш, ёшлар онгида Ватанпарварлик туйғуларини шакллантириш мақсадида, соҳа ходимлари ташаббуси билан, ҳамкорликда турли маънавий-маърифий ва спорт тадбирлари ўтказилиб келинаётганлигини алоҳида таъкидлади.
Бу эса ёшларнинг маънан етук ва жисмонан бақувват бўлиб улғайишига, уларнинг ҳарбий соҳага бўлган қизиқишларини оширишга хизмат қилаётганлиги айтиб ўтилди. Шундан сўнг, тадбир истеъдодли санъанкорлар ва болажонлар томонидан ижро этилган куй-қўшиқ ва рақсларга уланиб кетди.
Ўзбекистон Республикаси Миллий гвардияси ихтисослаштирилган мусиқа академик лицейи ҳамда ИИВнинг ашула ва рақс ансамбли созанда, хонанда, раққосалари ва таниқли қизиқчи Аваз Охуннинг чиқишлари барчага кўтаринки кайфият бағишлади. Иштирокчиларда улкан таассуротлар қолдирган концерт дастури якунида, бир гуруҳ фаол ёшларга, "Бахт" мактаби тарбияланувчиларига ҳамда хизмат ходимларининг фарзандларига бадиий китоблар жамланмаси туҳфа этилди.
