Миллий гвардия Фарғона вилояти бўйича бошқармаси, "Қўриқлаш" бошқармаси, вилоят Ҳарбий прокуратураси билан ҳамкорлигида ёшлар учун ҳарбий қисмда "Очиқ эшиклар куни" ташкил этилди.
Ёшларимизни ватанпарварлик руҳида тарбиялаш, миллий армиямизга жисмонан бақувват ва маънан етук ёшлар зарурлиги, ҳарбий хизмат ҳар бир Ўзбекистон фуқароси учун муқаддас бурч экани ҳақидаги тушунчани ҳамда бу борадаги назарий-амалий кўникмаларни мустаҳкамлаш мақсадида ташкил этилган тадбирга ҳарбий хизматга иштиёқманд 150 нафар ёшлар жалб қилинди.
Ўз фаолиятларини ҳарбий либос кийиш билан боғлаш истагини билдирган ҳар бир ёш иштирокчилар ҳарбий хизматчиларнинг ҳарбий ҳаёти, жанговар ва тактик машғулотларини кузатиш, ақлий ва жисмоний салоҳият касб этадиган ҳарбийлик касбининг нақадар шарафли эканлигини ўз кўзлари билан кўриб, ўзларида ҳам ватанпарварлик туйғулари мужассам эканлигини яшириб ўтиришмади. Шу билан бир қаторда, ҳарбий хизматчилар кун давомида бажарадиган машқларни амалий бажариб кўришди.
Кун тартибига мувофиқ ёшлар бошқармада ташкил этилган кутубхона, музей фаолияти, психологик хизмат кўрсатиш синфи, ҳарбий қисмда яратилган шарт-шароитлар билан танишиб чиқишди.Шундан сўнг, от спорти тўгарагининг фаолияти билан яқиндан танишиб от устида сайр қилдилар.
Бундай маънавий-маърифий ва спорт-соғломлаштириш кунларини мунтазам ўтказиш ёшларимизни ватанпарварлик руҳида тарбиялашга замин яратиши, шубҳасиздир.
