Миллий гвардия қўмондони раислигида ҳарбий хизматчилар ва ёшларни ватанпарварлик руҳида тарбиялаш тизимини такомиллаштиришга қаратилган видеоселектор йиғилиши бўлиб ўтди
Мазкур йиғилишда Миллий гвардия қўмондонлиги, тизимдаги таркибий ва ҳудудий бошқарма, бўлим, хизмат бошлиқлари, таълим муассаса раҳбарлари ҳамда соҳага оид мутасаддилар иштирок этишди.
Йиғилиш аввалида Миллий гвардия қўмондони генерал-майор Р.Джураев Ўзбекистон Республикаси Президенти, Қуролли Кучлар Олий Бош қўмондони Шавкат Мирзиёев раислигида ўтказилган Хавфсизлик кенгашининг кенгайтирилган йиғилишида белгилаб берилган устувор вазифаларга тўхталиб ўтди.
Шундан сўнг 2023 йил давомида тизимда амалга оширилган кенг кўламли ишлар ҳамда йўл қўйилган камчиликлар сарҳисоб қилиниб, шахсий таркиб ўртасида ҳарбий интизомни мустаҳкамлаш, ҳуқуқбузарликлар профилактикаси самарадорлигини ошириш борасидаги муҳим масалалар муҳокама қилинди.
Ҳарбий хизматчи ва ходимларнинг шахсий масъулиятини ошириш борасида қатъий тартиб интизом ва танқидий таҳлил олиб боришни кундалик меъёрга айлантириш юзасидан барча мансабдор шахсларга топшириқлар берилди.
Миллий гвардия қўмондони Давлатимиз раҳбарининг доимо эътибор марказида бўлган ёшлар сиёсати, тизим олдидаги устувор вазифалардан бири бўлиб қолишини айтиб, мазкур йўналишдаги вазифаларни барчамиз бир тану бир жон бўлиб бажаришимиз шартлигини таъкидлади.
Шунингдек, ёшларни ҳарбий ватанпарварлик руҳида тарбиялаш, уларнинг маънавий-ахлоқий тарбиясини тўғри шакллантириш, оммавий спортга жалб қилиш ҳамда бандлигини таъминлаш орқали турли таҳдидлардан ҳимоя қилишга қаратилган чора-тадбирларни кучайтириш борасида мутасадди раҳбарларга аниқ вазифалар белгилаб берилди.
