МИЛЛИЙ ГВАРДИЯ ҚЎМОНДОНИНИНГ ТОКИО ОЛИМПИЯ ЎЙИНЛАРИДА ЎЗБЕКИСТОН МИЛЛИЙ ТЕРМА ЖАМОАСИ ТАРКИБИДА ИШТИРОК ЭТГАН ЕТТИ НАФАР МИЛЛИЙ ГВАРДИЯ СПОРТЧИЛАРИ ВА УЛАРНИНГ МУРАББИЙЛАРИ БИЛАН УЧРАШУВИ БЎЛИБ ЎТДИ
Жорий йилнинг 14 август куни Миллий гвардия қўмондони генерал-майор Р.Джураевнинг Токио Олимпия ўйинларида Ўзбекистон миллий терма жамоаси таркибида иштирок этган Миллий гвардия спортчилари билан учрашуви бўлиб ўтди.
Тадбирда Тошкент шаҳар ҳокимлиги, Миллий Олимпия қўмитаси, Қўл жанги федерацияси ҳамда Миллий гвардия таркибий ва ҳудудий бўлинмалари мутасадди раҳбарлари, Токио Олимпиадасида иштирок этган 7 нафар спортчи-ҳарбий хизматчиларимиз, уларнинг ота-оналари ва мураббийлари, иштирок этдилар.
Миллий гвардия қўмондони кириш сўзида давлатимиз раҳбарининг куни кеча Олимпияда иштирокчиларини тақдирлаш маросимида "Албатта, жаҳоннинг энг йирик спорт мусобақаси бўлмиш Олимпия ўйинларида иштирок этишнинг ўзи катта шараф ва масъулият. Буни барчамиз яхши тушунамиз. Бунинг учун қанча оғир довонлардан, машаққатли синовлардан ўтиш талаб этилади”, деган сўзларини ёд олди.
Шунингдек, Миллий гвардия тизимидан мазкур мусобақаларда иштирок этган етти нафар мустақиллик йилларида туғилиб вояга етган боксчи ҳамда юнон-рум курашчиларимиз, ўз иқтидори, салоҳияти билан миллионлаб қалбларни забт этгани ҳамда бокс бўйича энг оғир вазнда иштирок этган ҳарбий хизматчимиз Баходир Жалолов дунёнинг номдор спортчилари билан беллашиб олимпиаданинг олтин медалини қўлга киритган ҳолда Ўзбекистон байроғини баланд кўтарилишига ва мадҳиямиз янграшига муносиб хиссасини қўшгани алоҳида таъкидлаб ўтилди.
Шундан сўнг Миллий гвардия қўмондонининг Олимпиада иштирокчилари ва уларнинг мураббийларини рағбатлантириш тўғрисидаги буйруғи ўқиб эшиттирилди. Унга кўра Олимпиадада иштирок этган етти нафар ҳарбий хизматчиларга Ўзбекистон Республикаси Миллий гвардияси шаънини муносиб ҳимоя қилиб ҳарбий хизматчи ва ходимлар орасида шахсий намуна кўрсатганликлари ҳамда олимпия спорт турларини оммалашишига қўшган хиссалари учун Алвон берет кийиш ҳуқуқи берилди.
Шунингдек, лейтенант Баходир Жалолов Ўзбекистон Республикаси Миллий гвардиясининг I даражали “Намунали хизматлари учун” кўкрак нишони ва қимматбахо совға билан;
Лейтенант Рахимова Турсуной, Лейтенант Қодирова Райҳона ва Лейтенант Батуров Бобо-Усмонлар Ўзбекистон Республикаси Миллий гвардиясининг II даражали “Намунали хизматлари учун” кўкрак нишони ва қимматбахо совғалар билан;
Катта лейтенант Элмурат Тасмуратов, Оддий аскарлар Жалғас Бердимуродов ва Элнур Абдураимовлар Ўзбекистон Республикаси Миллий гвардиясининг III даражали “Намунали хизматлари учун” кўкрак нишони ва қимматбахо совғалар билан тақдирландилар.
Шу билан бирга ушбу спортчиларимизнинг олимпиада ўйинларида иштирок этишлари учун ўзларининг муносиб хиссаларини қўшган, бокс бўйича Ўзбекистон Миллий терма жамоаси бош мураббийси Тўлқин Қиличев ва бокс бўйича мураббий Миллий гвардия Ихтисослаштирилган ўқув маркази катта ўқитувчиси майор Элшод Расулов, Спорт курашлари бўйича ихтисослаштирилган Олимпия захиралари мактаби мураббийси Равшан Рўзиқуловлар Ўзбекистон Республикаси Миллий гвардиясининг III даражали “Намунали хизматлари учун” кўкрак нишони билан тақдирландилар.
Тадбир якунида сўз олганлар томонидан ҳалқимиз учун юксак ғурур бахш этиб Янги Ўзбекистонимизга янги ғалабаларни туҳфа этган спортчиларимизга самимий тилаклар ва “Париж - 2024” ёзги Олимпиада ўйинларида ўзларининг зафарли юришларини давом эттириб, Ватанимиз шарафини муносиб ҳимоя қилишларига ишонч билдирдилар.
