Миллий гвардия шахсий таркибининг одоб-ахлоқ қоидаларига риоя қилиши масалалари аёл ҳарбий хизматчи ва ишчи хизматчилар иштирокида муҳокама қилинди
Ўзбекистон Республикаси Миллий гвардияси Марказий аппаратида аёл ҳарбий хизматчи ва ишчи хизматчилар иштирокида навбатдаги йиғилиш бўлиб ўтди.
Мажлисни тарбиявий ва мафкуравий ишлар бошқармасининг масъул офицери подполковник Б. Аширматова очиб берди. Иштирокчиларни кутиб олгандан сўнг, подполковник Б. Аширматова шахсий хавфсизлик бошқармасининг катта офицери подполковник Н. Урунбаевани таништирди. Унинг хизмат вазифалари доирасига аёл ҳарбий хизматчи ва ишчи хизматчилар билан ишлаш, уларга ижтимоий муаммоларни ҳал қилишда ёрдам бериш, ҳаётий қийин вазиятларда қўллаб-қувватлаш ҳам киради.
Мажлисда Миллий гвардия қўмондонининг "Ўзбекистон Республикаси Миллий гвардияси шахсий таркибининг одоб-ахлоқ қоидаларини тасдиқлаш тўғрисида"ги буйруғига шахсий таркиб ва ишчи хизматчилар томонидан риоя этилиши муҳокама қилинди. Ходимларнинг хизматдаги ва хизматдан ташқари вақтдаги хатти-ҳаракатлари, ташқи кўриниши ҳамда жамоада ва фуқаролар билан мулоқот қилиш услуби идоранинг обрўси ва имиджига бевосита таъсир қилиши таъкидланди. Қатнашчиларга дўстона, тўғри ва диққатли бўлиш, фуқаролар ва ҳамкасблар билан мулоқотда бағрикенглик ва ҳурмат кўрсатиш, шунингдек, хушмуомалалик, камтарлик ва вазминлик Миллий гвардия органларида хизмат қиладиган ҳар бир ходим ва ишчи хизматчининг вазифаси эканлиги эслатиб ўтилди. Маърузачилар фуқароларда ходимнинг ўз хизмат вазифаларини виждонан бажаришига шубҳа туғдириши мумкин бўлган хатти-ҳаракатларга йўл қўймасликга, шунингдек, Миллий гвардия обрўсига салбий таъсир кўрсатиши мумкин бўлган зиддиятли вазиятлардан муносиб равишда чиқиб кетишга чақиришди.
Очиқ мулоқот руҳида бўлиб ўтган йиғилишда қатнашчиларнинг фикр ва таклифлари тингланди, саволларга жавоблар берилди.
