Тадбирда тизимдаги Чавандозлар мактаблари мутасадди раҳбарлари ва мутахассислари иштирок этди.
Йиғилишда от спорти турларини аҳолига кенг тарғиб этиш, иқтидорли ёшларни аниқлаш ва уларни професционал спортчилар сифатида тайёрлаш, шунингдек миллий терма жамоамизнинг Олимпия ва Паралимпия, Осиё ва Параосиё ўйинлари, жаҳон чемпионатлари ва бошқа йирик мусобақаларда юқори натижаларга эришишини таъминлаш каби масалалар муҳокама қилинди.
Шунингдек, ҳудудларда от спортини ривожлантириш, мактабларга жалб этилган ўқувчи ва талаба-ёшларнинг эришаётган натижалари, уларнинг тегишли спорт даражаларини олиш имкониятлари, йилқичиликда насллик ишларини такомиллаштириш ва миллий меросимиз бўлган Қорабайир зотли отларни кўпайтириш бўйича амалга оширилаётган ишлар таҳлил қилинди.
Келгуси йилга устувор вазифа сифатида машғулотлар сифатини ошириш, ўқувчи-спортчиларга замонавий билим ва кўникмаларни бериш, мураббийлар малакасини ошириш ва инновацион усулларни жорий этиш белгилаб олинди.
Тадбир якунида иштирокчилар Миллий гвардия тизимидаги музей ва спорт масканлари фаолияти билан танишиб, ушбу масканларнинг тарихий аҳамияти ҳамда янги авлод чавандозларини тарбиялашдаги ўрни ҳақида маълумот олдилар.
Шунингдек, пойтахтда Ўзбекистон йилқичилик ва от спорти федерациясининг йил якунларига бағишланган тантанали маросим ўтказилди. Унда от спортининг тўсиқлардан сакраш, учкураш, от йўрттириш, човган, от устида камондан ўқ отиш каби турлари бўйича юксак натижаларга эришган спортчилар, мураббийлар, жамоалар эътироф этилди.
Маросимда “Йилнинг энг яхши спортчиси”, “Йилнинг энг яхши жамоаси”, “Йилнинг энг яхши мураббийи”, “Йилнинг энг яхши аъло спортчиси”, “Йилнинг энг яхши эркак спортчиси” ва “Йилнинг энг яхши вилояти” номинациялари бўйича ғолиблар эътироф этилди. “Йилнинг энг яхши чавандозлар мактаби” мукофоти эса Самарқанд вилояти Чавандозлар мактабига насиб этди.
Шунингдек, тадбирда “От спортининг фахрий спортчилари” ва “Йилнинг истиқболли ёшлари” кўкрак нишонлари ҳам ўз эгаларига топширилди.