Мамлакатимизда ёшларга оид давлат сиёсатини амалга ошириш, уларнинг интеллектуал ва маънавий салоҳиятини рўёбга чиқариш, шунингдек, ватанпарварлик руҳида тарбиялаш Давлатимиз раҳбарининг эътибор марказида бўлган асосий йўналишлардан биридир.
Бу борада олиб борилаётган ислоҳотларнинг муҳим жиҳатлари ҳамда глобаллашув жараёнида ёшларни ҳарбий ватанпарварлик руҳида тарбиялаш эса муҳим аҳамият касб этади, шу мақсадда амалга оширилаётган чора-тадбирлар доирасида Миллий гвардия қўмондони генерал-майор Рустам Джураевнинг ёшлар билан учрашуви ташкил этилди. Унда Ёшлар ишлари агентлиги директорининг биринчи ўринбосари Дилноза Каттаханова ҳам иштирок этди.
Тадбирда тизим фахрийлари, Жамоат хавфсизлиги университети курсантлари, “Темурбеклар мактаби” ҳарбий академик лицейи, Ҳарбий мусиқа академик лицейи, “Жасорат мактаби” ўқувчилари ҳамда 22 ва 30-сонли Меҳрибонлик уйи тарбияланувчилари, шунингдек, Қорақалпоғистон Республикаси ва барча вилоятлар бўйлаб  3000 га яқин ёш гвардиячилар видеоконференцалоқа орқали иштирок этишди.  
Миллий гвардия маънавият ва маърифат марказига ташриф буюрган ёшлар оркестр ижросидаги куйлар садоси остида тантанали равишда кутиб олинди. Улар учун китоблар ярмаркаси, курсантларнинг рацционализаторлик ишланмалари, Маънавият ва маърифат маркази томонидан тасвирий санъат ва рассомчилик кўргазмаси, робототехника воситалари, шунингдек, Меҳрибонлик уйлари тарбияланувчилари томонидан тайёрланган қўл меҳнати кўргазмаси ва бошқа тематик экспозициялар намойиш этилди.
Тадбирнинг расмий қисмидa Миллий гвардия қўмондони нутқ сўзлаб, ёшларни Янги Ўзбекистон келажаги, миллат таянчи сифатида эътироф этиб, улар учун Давлатимиз раҳбари томонидан яратилаётган кенг имкониятлар, хусусан, таълим, ҳарбий-ватанпарварлик, ижтимоий қўллаб-қувватлаш соҳасида амалга оширилаётган ислоҳотлар ва Миллий гвардия тизимидаги лойиҳалар ҳақида сўз юритди. Шунингдек, Ёшлар ишлари агентлиги директорининг биринчи ўринбосари Дилноза Каттаханова ҳам сўзга чиқиб, бугунги кунда мамлакатимиз ёшлари томонидан эришилаётган улкан ютуқлар, дунё ҳамжамияти томонидан эътироф этилаётгани ҳақида қатор мисоллар келтириб ўтган бўлса, Ўзбекистонда хизмат кўрсатган ёшлар мураббийси, фалсафа фанлари доктори, профессор Жамила Шермуҳамедова онлайн тарзда иштирок этиб, ўзининг жўшқин тилаклари билан ёшларга келажакдаги орзу-умидларига эришиш йўлидаги қийинчиликларни енгиб ўтишга катта мотивация берди.
Очиқ мулоқот остида давом этган учрашув мобайнида ёшлар сўзга чиқиб, Юртбошимиз томонидан яратилаётган кенг имкониятлар ва ишонч уларни янада фаол, ташаббускор ва масъулиятли бўлишга ундаётганини фахр билан таъкидлашди ва ўз фикр-мулоҳазаларини эркин баён қилиш билан бирга таклифларини ҳам бериб ўтишди.
Шундан сўнг, Жамоат хавфсизлиги университети, “Темурбеклар” мактаби, Ҳарбий мусиқа академик лицейи ҳамда “Жасорат мактабида”да таҳсил олаётган, намунавий хулқи ва аъло баҳолари билан тенгдошларига ўрнак бўлиб келаётган 10 нафар ёшлар Миллий гвардия қўмондони томонидан муносиб рағбатлантирилди.
Тадбирнинг бадиий қисмида Миллий гвардия ашула ва рақс ансамбли томонидан ижро этилган Ватанни мадҳ этувчи куй-қўшиқлар иштирокчиларда катта руҳий кўтаринкилик уйғотди.
Ушбу “Генерал ва ёшлар” очиқ мулоқотининг асосий мақсади — ёшларни Ватанга садоқат, фидойилик ва масъулият туйғулари асосида тарбиялаш, улар қалби ва онгига Ватан ҳимояси муқаддас бурч эканини чуқур сингдиришдан иборат бўлди.