Миллий гвардия ва ёшлар
Миллий гвардия Навоий вилояти бўйича бошқармаси томонидан ёшлар ва ўсмирларни ҳарбий-ватанпарварлик руҳида тарбиялаш, вояга етмаганлар ўртасида ҳуқуқбузарлик ва жиноятларнинг олдини олишга қаратилган тадбирлар мунтазам ўтказиб келинмоқда.
Жумладан, куни-кеча Зарафшон саноат касб-ҳунар коллежида Миллий гвардия Навоий вилояти бўйича бошқармаси вакиллари томонидан Ички ишлар бошқармаси билан ҳамкорликда ўқувчилар иштирокида ҳуқуқбузарликлар мавзусида суҳбат ўтказилди. Шунингдек, ёшларга ҳуқуқбузарликлар қандай турларга бўлиниши, қайси ҳолларда ҳуқуқбузарни маъмурий қайси ҳолларда эса жиноий жавобгарликка тортиш мумкинлиги тушунтирилди.
Учрашув сўнгида ёшлар ўзларини қизиқтирган саволларига жавоблар олди.
Зарафшон шаҳар "Қўриқлаш" бўлимида очиқ эшиклар куни ташкил этилиб, унга 2-сонли умумтаълим мактаб ўқувчилари таклиф қилинди. Тадбир давомида болаларга "Қўриқлаш" хизматининг вазифалари ҳақида сўзлаб берилиб, қўриқлов сигнализация қурилмалари билан таништирилди. Айниқса, тезкор гуруҳлар фаолияти ҳақидаги маълумотлар мактаб ўқувчиларида катта қизиқиш уйғотди.
Очиқ эшиклар кунида иштирокчилар имкон қадар фойдали маълумотлар олишлари учун
"Қўриқлаш" бўлими ходимлари ўша куни Фавқулодда вазиятлар бошқармасидан ҳамкасбларини таклиф қилишди. Фавқулодда вазиятлар вазирлигининг ҳудудий бўлинмаси ходимлари томонидан махсус техникалар кўргазмаси ташкил этилиб, ёнғин хавфсизлиги бўйича суҳбат ўтказилди.
