МЕҲРГА МУҲТОЖ БОЛАЛАРНИ ҚЎЛЛАБ-ҚУВВАТЛАШ БОРАСИДА АМАЛГА ОШИРИЛАЁТГАН КЕНГ ИСЛОҲОТЛАР
Жорий йилнинг 4 август куни Ўзбекистон касаба уюшмалари Федерациясини раиси Қ.Рафиқов раислигида Аёллар муаммоларини тизимли равишда ҳал этиш, уларни ижтимоий қўллаб-қувватлаш бўйича республика комиссиясининг навбатдаги кенгайтирилган видеоселектор йиғилиши ўтказилди.
Мазкур йиғилишда, Ўзбекистон Республикаси Президенти Маслаҳатчисининг ўринбосари О.Салиев, Миллий гвардия қўмондони Р.Джураев, Хотин-қизлар муаммоларини тизимли равишда ҳал этиш, уларни ижтимоий қўллаб-қувватлаш бўйича республика комиссияси аъзолари, Қорақалпоғистон Республикаси Вазирлар Кенгаши раисининг, вилоятлар ва Тошкент шаҳар ҳокимларининг ўринбосарлари, туман (шаҳар)лар ҳокимлари, Миллий гвардия ҳамда бошқа мутасадди идораларнинг раҳбар ходимлари иштирок этдилар.
Йиғилиш давомида "Аёллар дафтари"нинг иккинчи босқичи доирасида амалга ошириладиган вазифалар ҳамда Меҳрибонлик уйлари, болалар шаҳарчалари ва оилавий болалар уйларида тарбияланаётган қизларнинг муаммолари, эҳтиёжларини ўрганиш ҳамда уларни ҳал этиш, орзу-истакларини рўёбга чиқаришга кўмаклашиш чора-тадбирлари муҳокама қилиниб, масъуллар олдига бир қатор устувор вазифалар белгилаб берилди.
Кун тартибидаги иккинчи масала юзасидан сўз олган Миллий гвардия қўмондони Р.Джураев бугунги кунда мамлакатимизда ёшларни айниқса, меҳрга муҳтож болаларни қўллаб-қувватлаш борасида амалга оширилаётган кенг ислоҳотларга тўхталиб ўтди.
Мавзу доирасида, юртбошимиз раислигида 28 июль куни ўтказилган видеоселектор йиғилиши ёдга олиниб, унда кам таъминланган оилалар ҳамда меҳрибонлик уйларида истиқомат қилувчи болаларни қўллаб-қувватлашга алоҳида эътибор қаратилганлиги, шунингдек, давлатимиз раҳбари томонидан ушбу йўналишда йўл қўйилган камчиликларга танқидий баҳо берилганлиги ва бу борада янги тизим жорий қилиниб, бунга Миллий гвардия масъул этиб белгилангани тўғрида фикр юритилди.
Шундан сўнг, ҳозирда Миллий гвардия томонидан меҳрибонлик уйлари фаолиятини янада такомиллаштириш, бу йўналишда туб ислоҳотларни жорий этиш ҳамда муаммоли масалаларни ҳал этиш бўйича амалга оширилаётган ва режалаштирилган ишларга тўхталиб ўтилди. Улар:
“Меҳрибонлик уйлари” ва “Болалар шаҳарчалари”га Миллий гвардиянинг ҳудудий бошқарма бошлиқлари, ҳар бир гуруҳга малакали офицер ва психологлар бириктирилаётганлиги;
Шунингдек, болаларни ватанпарварлик руҳида тарбиялаш мақсадида Миллий гвардиянинг ҳарбий қисмлари, полигонлари, “чавандозлар мактаблари”га олиб чиқиб, ҳарбий техникадан фойдаланишга, от спортига ўргатиш, улар учун якка кураш, футбол, сузиш, теннис, шахмат каби спорт тўгаракларини ташкил этиш;
меҳрибонлик уйларига бириктирилган ҳарбий хизматчи ва ходимларни болалар билан ишлашга ўқитиш;
болаларга тарбия бериш, уларни хорижий тиллар, касб-ҳунар ва тадбиркорликка ўқитиш, спортнинг нуфузли турлари билан шуғулланишларини ташкил этиш бўйича мутлақо янги методикаларни ишлаб чиқиш;
буюк аждодларимизни маънавий меросларини ўрганиш ва ички туризмни кенг жалб этиш мақсадида Бухоро, Самарқанд, Хива, Шаҳрисабз, Қўқон, Термиз каби қадимий шаҳарларга саёҳатлар ташкиллаштириш;
ушбу болалар орасидан келгусида “Темурбеклар мактаблари”га, Жамоат хавфсизлиги университетига ўқишга қабул қилинишини йўлга қўйиш;
ҳокимликлар билан бирга 14 ёшдан юқори ўғил-қизларни, энг талаб юқори касбларга ўргатишни йўлга қўйиш;
васийлик, ҳомийлик ва патронатга олинган болалар аҳволи, уларнинг оилавий шароитидан ҳафталик хабар оладиган тизим яратиш;
“Меҳрибонлик уйлари” тарбияланувчилари билан ишлашнинг янги тизимини жорий этиш орқали уларни Ватанимизнинг чинакам посбонлари этиб етишиб чиқишлари учун барча куч имкониятларни сафарбар этиш, асосий вазифалардан бири этиб белгилаб олинганлиги таъкидланди.
Миллий гвардия қўмондони ўз маърузаси якунида Муҳтарам Президентимиз томонидан қўйилган вазифаларни ҳамкор ташкилот ва идоралар билан биргаликда юқори савияда бажарилишига, меҳрга муҳтож болаларни жамиятда муносиб ўрин эгаллашлари ҳамда уларнинг ватанпарварлик руҳида камол топишларига ишонч билдирди.
