МУСТАҚИЛЛИГИМИЗНИНГ 30 ЙИЛЛИК БАЙРАМИ АРАФАСИДА НАВБАТДАГИ ЯНГИ БИНО ФОЙДАЛАНИШГА ТОПШИРИЛДИ
Бугун 27 август куни Мустақиллигимизнинг 30 йиллиги байрами арафасида қуриб битказилган Миллий гвардиянинг Тошкент шаҳар Қўриқлаш бошқармаси Шайхонтоҳур тумани қўриқлаш бўлими маъмурий биноси тантанали равишда фойдаланишга топширилди.
Мазкур тантанали маросимда Миллий гвардия қўмондони Р.Джураев, Тошкент шаҳар ҳокимининг ёшлар сиёсати, ижтимоий ривожланиш ва маънавий-маърифий ишлар бўйича ўринбосари Д.Раҳимова,Миллий гвардия мутасадди раҳбарлари,Тошкент шаҳар Қўриқлаш бошқармаси шахсий таркиби ҳамда ушбу янги бинонинг қад кўтаришида яқиндан ёрдам берган ташкилот вакиллари иштирок этдилар.
Миллий гвардия қўмондони ўзининг кириш сўзида, байрам арафасида фойдаланишга топширилаётган ушбу янги бино шахсий таркиб учун муносиб совға эканлигини таъкидлаб, тантанали маросимга ташриф буюрган меҳмонларни ва саф тортиб турган барча Миллий гвардия ходимларини ҳамда улар орқали барча яқинларини Мустақиллигимизнинг 30 йиллик юбилейи билан самимий муборакбод этди.
Тадбир давомида сўз олганлар бугунги кунда Миллий гвардия бўлинмалари аҳоли гавжум жойларда, савдо марказлари ва бозорлар, кўнгилочар масканлар, истироҳат боғлари ҳамда оммавий тадбирлар жараёнида жамоат тартибини сақлаш ва хавфсизликни таъминлаш, жисмоний ва юридик шахсларни мол-мулкларини ишончли қўриқлаш каби шарафли ва масъулиятли вазифаларни юқори савияда бажариб келаётганларига алоҳида урғу бериб, янги бинода яратилган бу каби имкониятлар барча ходимларга янада куч-қувват ва шижоат ато этишига ишонч билдирдилар.
Шундан сўнг Миллий гвардия қўмондонининг буйруғига кўра, хизмат фаолияти давомида юқори натижаларга эришган, фидойилиги ва жонкуярлиги билан сафдошларига намуна бўлиб келаётган бир гуруҳ ходимларга “Намунали хизматлари учун” кўкрак нишони, “Маънавият аълочиси” кўкрак нишони ҳамда фахрий ёрлиқлар топширилди.
Ташриф буюрган меҳмонлар янги бино билан танишиш давомида, ўз тарихига эга бўлган ушбу бино ўтган асрнинг 30-йилларида меъморчиликнинг классицизм услубида бунёд этилганлиги ва маданий мерос объектлари рўйхатига киритилганлиги тўғрисидаги маълумотларга эга бўлиб, уларда ушбу бинонинг тарихий ўзига хослиги сақланган ҳолда замонавий талаблар асосида таъмирлаганлиги катта таъсирот қолдирди.
Мазкур янги бинода навбатчилик қисми, Маърифат ва психолог хоналари, ошхона ҳамда фуқароларни қабул қилиш хоналари шунингдек, ходимларнинг хизмат қилиши, касбий маҳоратини ошириши учун ва спорт билан мунтазам шуғулланишлари учун барча шарт-шароитлар яратилган. Хусусан замон талабларига тўлиқ жавоб берадиган универсал очиқ ва ёпиқ спорт мажмуаларида бир вақтнинг ўзида спортнинг “Қўл жанги”, Бокс, Кроссфит, Дзюдо, мини футбол, волейбол ва баскетбол каби турлари бўйича машғулотлар ўтиш учун имкониятлар мавжуд.
