Миллий гвардия ҳарбий хизматчи ва ходимлари томонидан сизнинг ҳамда фарзандларингизнинг саломатлигига тузатиб бўлмас даражада зарар етказиши мумкин бўлган сертификатсиз пиротехника воситалари савдосини олдини олишга қаратилган тадбирлар давом эттирилмоқда. Оилангизнинг фаровонлиги ва тинчлигига хавф туғдирманг.
Пиротехника воситаларини харид қилманг ҳамда болажонларга уларнинг хатарли эканлиги тўғрисида сўзлаб беринг.
Лицензиясиз пиротехника маҳсулотларини аниқлаш бўйича олиб борилган тадбирларнинг натижалари ҳақида маълумот беришда давом этамиз.

НАМАНГАН ВИЛОЯТИ. Қўшма тадбирлар давомида Миллий гвардия Наманган вилояти бўйича бошқармаси ҳарбий хизматчилари ва Янгиқўрғон тумани Ички ишлар бўлими ходимлари томонидан сертификатланмаган пиротехника воситаларини сотиш билан шуғулланаётган фуқаролар ушланди. Тадбир давомида фуқаро И.Б ва Р.M.нинг ёнидан жами 18 блок
"Трения" ва "Британик" номли пиротехника воситалари топилди ва мусодара қилинди.
Шу куни ҳарбий хизматчи ва ҳуқуқ-тартибот идоралари ходимлари томонидан яна бир хавфли бўлган пиротехника воситалари сотувчиси аниқланди. Суриштирув ишлари давомида ҳуқуқбузар M. Б. уйида умумий қиймати 20 миллион сўмдан ортиқ бўлган 24741 дона турли хил пиротехника воситалари сақлаётганлиги маълум бўлди.

НАВОИЙ ВИЛОЯТИ. Жорий йилнинг 24 декабрь куни Миллий гвардия Навоий вилояти бўйича бошқармаси ҳарбий хизматчилари томонидан вояга етмаган ёшларга пиротехника воситаларини сотишга уринган 41 ёшли фуқаро К.У. қўлга олинди. Гувоҳлар иштирокида ўтказилган текширув давомида ҳуқуқбузарнинг ёнидан қиймати 470 минг сўм бўлган 18 блок "Трения","Британик" ва 1 дона "Волк" номли пиротехника воситалари мавжудлиги аниқланди ва мусодара қилинди. Шунингдек, яна бир сертификатланмаган пиротехника маҳсулотларини сотаётган шахс аниқланди. Фуқаро Н.Ш. 3 блок "Трения" номли пиротехника воситаларини сотаётган вақтида қўлга олинди.

ЖИЗЗАХ ВИЛОЯТИ. Миллий гвардия Жиззах вилояти бўйича бошқармаси ҳарбий хизматчилари ва вилоят Ички ишлар бошқармаси ходимлари томонидан катта миқдордаги сертификатланмаган пиротехника буюмларини сотаётган шахс аниқланди. 30 ёшли фуқаро А.Х.дан умумий баҳоси 11 миллион сўм бўлган 1100 дона "Ракета" салюти мусодара қилинди.

СУРХОНДАРЁ ВИЛОЯТИ. Миллий гвардия Сурхондарё вилояти бўйича бошқармаси ҳарбий хизматчилари ҳам катта миқдордаги сертификатланмаган пиротехника воситалари сотувчисини қўлга олди. Фуқаро Т.А. 27 блок "Британик" номли пиротехника учун 4860000 сўм олаётган вақтида ушланди.

ФАРҒОНА ВИЛОЯТИ. Миллий гвардия Фарғона вилояти бўйича бошқармаси ҳарбий хизматчилари томонидан бир куннинг ўзида ноқонуний пиротехника воситалари сотилишига оид учта маълумот аниқланди. Фарғоналик А. А. 8 дона "7 SHOTS" номли пиротехника воситасини бир миллион сўмга сотаётган вақтида қўлга олинди. Марғилонлик Н. Б. ҳам 48 блок
"Британик" номли пиротехника воситаларини 3 миллион сўмга сотмоқчи бўлганида ушланди. Шунингдек, 47 ёшли фуқаро Р.Д.дан 8 дона "7 SHOTS" номли пиротехника воситалари мусодара қилинди.

Аниқланган ҳар бир маълумот юзасидан тегишли ҳужжатлар расмийлаштирилди

Ҳурматли юртдошлар!
Шуни эслатиб ўтамизки, пиротехника маҳсулотлари билан ноқонуний савдо қилиш Ўзбекистон Республикаси Маъмурий жавобгарлик тўғрисидаги кодексининг 185-1-моддаси бўйича ашёлар мусодара қилиниб, беш бараваридан йигирма бараваригача миқдорда жарима солишга сабаб бўлади.
Пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, худди шунингдек, уларни қонунга хилоф равишда Ўзбекистон Республикасига олиб кириш (Ўзбекистон Республикасидан олиб чиқиш) ёки ўтказиш анча миқдорда ёхуд шундай ҳаракатлар маъмурий жазо қўлланилганидан кейин содир этилган бўлса, Ўзбекистон Республикаси Жиноят кодексининг 250-1-моддасига асосан жиноий жавобгарликка тортилади.