Мамлакатимизда ҳарбий хизматчилар ва уларнинг оила аъзоларини ижтимоий ҳимоя қилишни кучайтириш йўлида амалга оширилаётган ислоҳотлар кун сайин ўз натижасини кўрсатмоқда. Янги 2021 йилнинг илк кунлари ҳам сўзимиз далилидир. 7 январь куни Наманган вилояти бўйича Миллий гвардия бошқармаси ҳарбий хизматчилари учун шодиёна бўлди десак муболаға бўлмайди. Сабаби, Миллий гвардия сафларида сидқидилдан хизмат қилиб келаётган 30 нафар ҳарбий хизматчиларга янги замонавий меъморий услубда қурилган 5 қаватли уйларнинг хонадон калитларини тантанали равишда топшириш маросими бўлиб ўтди.
Тантанали тадбирда Наманган вилоят ҳокими, Миллий гвардия қўмондонлиги, шарқий ҳарбий округ қўмондони, шаҳар ҳокимияти, давлат ва жамоат ташкилотлари вакиллари, шунингдек ҳарбий хизматчилар ҳамда уларнинг оила аъзолари иштирок этдилар.
Тадбир давомида давлатимиз томонидан Миллий гвардия ҳарбий хизматчилари, уларнинг оилалари учун муносиб шароитлар яратишга катта эътибор берилаётганлиги таъкидланиб, хизмат бурчини садоқат ила сидқидилдан бажариб келаётган ҳарбий хизматчи ва ходимларига миннатдорчилик сўзлари изҳор этилиб, янги уйлар билан муборакбод этилди.
Нуроний отахону-онахонларимиз хонадон эгаларига ушбу кичик Ватан аталмиш гўшаларда тўй томошалар қилиб, яхши кунларини ўтказишларини тилаб дуо қилдилар.
Хулоса ўрнида шуни таъкидлашимиз керакки, имтиёзли равишда кўп йиллик ипотека кредити асосида тақдим этилган ушбу уйлар ёш ҳарбий хизматчиларнинг маиший шароитларини яхшилашда, оилавий тотувликни сақлашида давлатимиз томонидан қўллаб-қувватлаётганининг ёрқин намунасидир.