Олдин хабар берганимиздек Миллий гвардия қўмондони генерал-майор Р.Джураев раҳбарлигидаги идоралараро ишчи гуруҳ Хоразм вилоятида Давлатимиз раҳбари топшириқларининг амалий ижросини таъминлаш чораларини кўрмоқда.
Тадбир жараёнида асосий эътибор аҳолининг ижтимоий-иқтисодий, таълим, соғлиқни сақлаш, ҳуқуқни муҳофаза қилиш ва коммунал соҳадаги муаммоларни аниқлаш ҳамда бартараф этиш, криминоген вазиятни янада барқарорлаштириш ҳамда йўлларда фуқаролар хавфсизлиги учун муносиб шароитларни яратиш, йўлларнинг инфратузилмасини такомиллаштириш масалаларига қаратилмоқда.
Хусусан, бугун Миллий гвардия қўмондони бошчилигидаги ишчи гуруҳ Урганч шаҳар деҳқон бозоридаги нарх-наволар барқарорлиги ва аҳолига етказиб берилаётган озиқ-овқатларнинг сифати, тадбиркорлар учун яратилган шароитларлар ҳолати, таълим муассасаларида ўқувчиларнинг таълим-тарбия олишлари ва спорт билан шуғулланишлари учун яратилган шарт-шароитлар ҳамда вояга етмаганларга ижтимоий-ҳуқуқий ҳимоя кўрсатиш марказидаги болалар ва уларнинг соғлиги билан боғлиқ масалалар, Давлат хизматлари марказида ташкил қилинган пробация назоратидаги ҳунармандлар фаолияти ўрганилди. Шунингдек, туман ва маҳаллаларда аҳолининг мурожаатлари билан ишлаш аҳволи юзасидан бешлик билан учрашиб фикр мулоҳазалари тингланди.
Ишчи гуруҳ томонидан ўрганилган ва аниқланган муаммоли масалаларни тезкор бартараф этиш чоралари юзасидан Миллий гвардия қўмондони раислигида видео-селектор тарзидаги йиғилиш ўтказилди. Унда вилоят ҳокими в.в.б Ж.Раҳимов, ИИВ ўринбосари генерал-майор Б.Абдуллаев, Адлия вазирлиги, Солиқ қўмитаси, Бош прокуратура ва унинг тузилмалари раҳбарлари, вилоятнинг сектор раҳбарлари, Миллий гвардиянинг соҳавий хизматлари ҳамда бошқа мутасадди идоралар масъуллари иштирок этишди.
Миллий гвардия қўмондони томонидан идоралараро ишчи гуруҳ таркибига аъзо масъул вазирликларнинг мутасадди раҳбарларига тегишлилиги бўйича мавжуд муаммоларни аниқлаш ҳамда ўз вақтида бартараф этиш чораларини кўриш юзасидан аниқ вазифалар ва уларнинг ижро муддатлари белгилаб берилди.
Хоразм вилоятида Идоралараро ишчи гуруҳнинг фаолияти давом этмоқда. Амалга оширилган ишлар бўйича маълумотлар расмий сайтларимиз орқали ёритиб борилади.
