ҒОЛИБЛИКНИ КЎЗЛАБ
Ёшларни ҳарбий ватанпарварлик руҳида тарбиялаш, спортга кенг жалб қилиш ва уларнинг бўш вақтларини мазмунли ўтказиш мақсадида Ўзбекистон Республикаси Миллий гвардиясига бириктирилган Тошкент шаҳрида жойлашган мактабларнинг юқори синф ўқувчилари ўртасида спорт мусобақалари ўтказилди.
Миллий гвардияга бириктирилган Тошкент шаҳридаги 58, 161, 172 ва 326-сонли умумий ўрта-таълим мактабларининг 7 синфдан 9-синфгача бўлган ўқувчилари орасидан саралаб олинган болалар тенгдошлари билан спорт мусобақасида беллашиш учун Ўзбекистон Республикаси Миллий гвардияси Ихтисослаштирилган ўқув маркази ва “Динамо” жисмоний тарбия спорт жамияти ҳудудига ташриф буюришди. Спорт мусобақаси олдидан, даставвал, ўқувчи ёшлар билан дзюдо спорт тури бўйича бир неча бор Осиё ва Жаҳон чемпионати ғолиблари, олимпиада ўйинлари совриндорлари “Ўзбекистон Ифтихори”лари Ришод Собиров ва Абдулла Тангриевлар билан учрашув ташкиллаштирилди. Учрашув давомида спортчиларимиз чемпионлик сирлари ҳақида сўзлаб, ўқувчи ёшларни қизиқтирган саволларига жавоб беришди.
Шундан сўнг жамоалар спорт турлари бўйича баҳсларни бошлаб юборишди. Ҳарбийлаштирилган эстафета, турникда тортилиш, ўқув гранатасини узоққа улоқтириш, 60 метр масофага югуриш, арқон тортиш каби спорт турларида ўқувчилар ўзаро куч синашдилар. Спорт мусобақасини Ўзбекистон ифтихорлари бошқариб боргани унинг қизиқарли ўтишига яна бир сабаб бўлди.
Баҳсларга бой ўтган мусобақа якунида учинчи ўринга 58-мактаб жамоаси, иккинчи ўринга 161-мактаб жамоаси лойиқ деб топилди. Фахрли биринчи ўринни эса 172-мактаб жамоаси қўлга киритди. Ғолиблар медаль, кубок ва эсдалик совғалар билан тақдирландилар.
