ВИКТОРИНА ҒОЛИБЛАРИ АНИҚЛАНДИ
Ўзбекистон Республикаси Миллий гвардиясининг ҳудудий бошқармалари, ҳарбий қисмлари ва таълим муассасаларида хорижий тиллар – рус, инглиз, немис, хитой ва араб тилларини ўрганиш бўйича тизимли ишлар йўлга қўйилган.
Ўрганилаётган тил кўникмаларини мунтазам равишда ривожлантириш ва уларнинг самарасини намоён этиш мақсадида Миллий гвардия таркибий ва ҳудудий бўлинмалари ўртасида инглиз тили Викторинасини ҳар йили ўтказилиши анъанага айланган.
Куни Миллий гвардия Темурбеклар мактаби Маънавият марказида 14 январь – Ўзбекистон Республикаси Қуролли Кучлари ташкил этилганлигининг 29 йиллиги ҳамда Ватан ҳимоячилари куни байрами муносабати билан ушбу Викторинанинг республика босқичи ўтказилди.
Беллашувда 6 нафар иштирокчидан иборат бўлган 9 та жамоа 3 та шарт асосида беллашдилар. Жамоа аъзоларининг билим ва кўникмалари Миллий гвардия қўмондонлиги вакиллари, Ўзбекистон давлат жаҳон тиллари университетидан ташриф буюрган ўқитувчилардан ташкил топган Ҳакамлар ҳайъати томонидан адолатли баҳолаб борилди.
«Таништирув», «Савол-жавоб», “Сардорлар баҳси” шартларида жамоалар эгаллаган тил кўникмаларини ўз фикрларини инглиз тилида эркин ва равон ифода этишлари орқали намоён этдилар.
Якуний натижаларга кўра, 3-ўринни Миллий гвардия Тошкент шахар бошқармасининг “Guardians” жамоаси, 2-ўринни Миллий гвардия Республика ихтисослаштирилган мусиқа академик лицейининг “Perfect generation” жамоаси ва фахрли 1-ўринни Миллий гвардия Қорақалпоғистон Республикаси бошқармасининг “Жайхун” жамоаси қўлга киритди.
Шунингдек, “Guardian lions” жамоаси иштирокчиси Мизаев Ғайрат “Энг яхши иштирокчи” номинациясига эга бўлди. Муносиб иштирок этган барча ғолиб ва совриндорлар Миллий гвардия қўмондонлиги томонидан махсус диплом ва қимматбаҳо совғалар билан тақдирландилар.
