ЎҚУВЧИЛАРИМИЗ ЮТУҚЛАРИ
Ўқувчи-ёшларни ҳарбий-ватанпарварлик руҳида тарбиялаш, билимларини такомиллаштириш ҳамда улар ўртасида дўстлик алоқаларини мустаҳкамлаш ва соғлом рақобат муҳитини яратиш мақсадида Миллий гвардия Тошкент Темурбеклар мактабида фан олимпиадаси ўтказилди.
Олимпиадада Миллий гвардия идоравий академик лицейлари ҳамда Жиззах вилоятидаги “Темурбеклар ўғлонлари” нодавлат таълим муассасаси 10 ва 11-синф ўқувчилари иштирок этиб, аниқ фанлар (математика) йўналишида умумтаълим фанлари ўз билимларини синовдан ўтказдилар.
Мазкур фан олимпиадаси конкурс характерига эга интеллектуал ижодий тадбир бўлиб, ўқувчилар орасида аниқ фанлар йўналишида эгаллаган чуқур билимларини ва амалий кўникмаларини аниқлашга йўналтирилган. Фан олимпиадасида ҳар бир ўқув муассасасидан иккита синфнинг 5 нафардан жами 10 нафар энг зукко ва билимли ўқувчилари иштирок этишди. Уларга 50 тадан иборат математика фанидан тест саволлари тақдим этилиб, маълум вақт белгиланди.
Мусобақа шаффоф ва холис ўтиши учун Халқ таълими вазирлиги масъул вакиллари ва Миллий гвардия қўмондонлиги Ҳарбий кадрларни тайёрлаш бўлими мутахассис офицерлари тест жараёнларини кузатиб бордилар.
Белгиланган вақт ўз ниҳоясига етгач, якуний натижалар мутахассислар томонидан синчковлик билан текширилди. Натижага кўра Темурбеклар мактаби ўқувчилари аниқ фанлар йўналишида тенгдошларидан бироз устун эканликларини амалда исбот этишди. Энг яхши натижа кўрсатган ўқувчиларга биринчи, иккинчи ва учинчи даражали сертификатлар топширилди.
