Тил – давлат тимсоли, мулки, руҳи, миллатнинг маданий ва маънавий бойлиги, халқнинг маданияти, урф-одати, унинг турмуш тарзи, тарихидир. Тил бор экан миллат барҳаёт. Тилни мўътабар зот-онага қиёсланиши бежиз эмас, инсон ўз онасини кўрмасдан, унинг соф муҳаббатини, меҳрини тўймасдан яшай олмайди. Фикримизнинг исботи сифатида Давлатимиз раҳбарининг қуйидаги нутқини келтириб ўтамиз.
"Кимда ким ўзбек тилининг бор латофатини жозибаси ва таъсир кучини, чексиз имкониятларини ҳис қилмоқчи бўлса, мунис онажонларимизнинг аллаларини, минг йиллик достонларимизни, ўлмас мақомларимизни эшитсин, Бахши ва ҳофизларимизнинг сеҳрли қўшиқларига қулоқ тутишсин".
Ўзбек тилига давлат тили мақоми берилганига 33 йил тўлиши ва мазкур сана "Ўзбек тили байрами куни" сифатида кенг нишонланиши муносабати билан республика миқёсида қатор маданий-маърифий тадбирлар ташкил этилмоқда.
Хусусан, куни кеча Миллий гвардия қўмондонлиги, Вазирлар Маҳкамасининг Маънавият ва давлат тилини ривожлантириш масалалари Департаменти масъул ходими З.Рўзиев, Олий Мажлис Қонунчилик палатаси Ёшлар масалалари бўйича комиссия раиси М.Валиев, Ўзбекистон Халқ артисти Т.Мўминов, Ўзбекистон Халқ артисти А.Рафиқов, Ўзбекистон Ёзувчилар уюшмаси раисининг биринчи ўринбосари, шоир Б.Эргашевлар иштирокида "Қадринг баланд бўлсин, она тилим" шиори остида тадбир бўлиб ўтди.
Давра суҳбати давомида масъул вакиллар томонидан ўзбек тилининг ҳуқуқий мақомини белгилашда енгиб ўтилган қийинчиликлардан тортиб ҳозирги кунда тилимизнинг бой имкониятларидан кенг фойдаланиш учун яратилган шарт – шароитлар ҳамда давлат тилини янги поғонага олиб чиқиш борасида қилинаётган саъй-ҳаракатлар алоҳида эътироф этилди.
Шунингдек, ўзбек тилининг халқаро миқёсдаги обрў-эътиборини юксалтириш учун уни миллий ва умумбашарий тушунчалар асосида тараққий этган тиллар сафига киритишда ўз ҳиссамизни қўшишимиз зарурлиги ҳамда ҳар биримиздан тилимизга чуқур ҳурмат билан ёндашишни талаб этиши таъкидланди.
Устоз санъаткорлар томонидан кун мавзусига доир ижро этилган монологлар, достонлардан шеърий парчалар, она тилни улуғловчи бадиий чиқишлар барча тадбир иштирокчиларда кўтаринки руҳ ва фахр-ифтихор уйғотди.
Хулоса ўрнида шуни таъкидлаш жоизки, тилимизни эъзозлаш, унинг давлат тили сифатидаги мақоми, жамиятдаги мавқеини юксалтириш, ёш авлодни она тилига ҳурмат руҳида тарбиялаш ҳамиша долзарб маънавий бурчимиз бўлиб қолади.