Ўзбекистон Республикаси мустақиллигининг 34 йиллиги муносабати билан Миллий гвардия тизимида фидокорона хизмат қилиб келаётган бир гуруҳ гвардиячиларга давлат мукофоти ва идоравий мукофотлар тантанали равишда топширилди.
Юртбошимиз ташаббуси билан, Ватанимиз мустақиллигининг ўттиз тўрт йиллик байрами бу йил “Ватан учун, Миллат учун, Халқ учун!” бош ғояси остида кенг нишонланмоқда ва бунда Миллий истиқлолимизнинг энг буюк мақсади инсонга эътибор, унинг қадрини меҳнатини улуғлаш, олижаноб халқимизнинг иззат-ҳурматини жойига қўйиш асосий мақсад қилиб олинган.
Давлатимиз раҳбарининг “Ўзбекистон Республикаси давлат мустақиллигининг ўттиз тўрт йиллиги муносабати билан барча соҳа вакиллари қатори ҳарбий хизматчилар ва ҳуқуқни муҳофаза қилиш органлари ходимларидан бир гуруҳини мукофотлаш тўғрисида"ги Фармони билан 9 нафар гвардиячилар ҳам муносиб тақдирландилар.
Байрам муносабати билан бугун Миллий гвардия марказий девонида тантанали тадбир ташкиллаштирилди. Унда таркибий ва ҳудудий бўлинмалар, ҳарбий қисм ва таълим муассасалари шахсий таркиби, ишчи ходимлари ҳамда фахрийлар кенгаши аъзолари иштирок этишди. Тадбирда Миллий гвардия қўмондони генерал-майор Р.Джураев барча шахсий таркибни мустақиллигимизнинг 34 йиллиги билан табриклаб, самимий тилакларини билдирди.
Шундан сўнг, Юртимиз тараққиёти йўлида, халқимиз тинчлиги ва осойишталигини таъминлашдек масъулиятли ҳамда шарафли бурчини бажариш чоғида мардлик, жасорат ва фидойилик кўрсатгани, шунингдек ёш авлодни она Ватанга муҳаббат ва садоқат руҳида тарбиялаш йўлидаги самарали хизматлари учун бир гуруҳ гвардиячиларимизга Юртбошимиз Фармони билан берилган юксак давлат мукофотлари ўз эгаларига тантанали равишда топширилди.
“Шуҳрат” медали соҳиби бўлган Миллий гвардия марказий девони катта офицери Аширматова Барно Сааталиевнага давлат мукофотининг бевосита Давлатимиз раҳбари томонидан топширилиши — Миллий гвардия фаолиятига бўлган юксак ишонч ва эътиборнинг ёрқин ифодаси эканлиги ва бутун тизим шахсий таркиби учун катта шарафлиги таъкидлаб ўтилди.
Шунингдек, энг улуғ, энг азиз байрам Мустақиллик куни муносабати билан Миллий гвардия қўмондони буйруғига асосан хизматда юқори натижаларга эришган 6 нафар раҳбар ходимларга навбатдаги “полковник” ҳарбий ҳамда махсус унвони ҳамда 400 дан ортиқ гвардиячиларга идоравий кўкрак нишонлари ва эсдалик совғалари топширилди.
Мазкур байрам муносабати билан тизимда фаолият юритиб келаётган гвардиячилар, фахрийлар ҳамда ишчи-хизматчиларнинг муносиб тақдирланганлиги, уларнинг кейинги хизмат давомидаги шижоатини оширишга хизмат қилади десак муболаға бўлмайди.
Фурсатдан фойдаланиб барча юртдошларимизни мустақиллигимизнинг 34 йиллиги билан самимий муборакбод этамиз. Юртимиз тинч, осмонимиз мусаффо бўлсин!
